Examinado o expediente de solicitude de clasificación da Fundación Club Financiero de Santiago con domicilio na rúa Salgueiriños de Abaixo núm. 9, Santiago de Compostela.

Feitos:

1. Roberto Pereira Costa, presidente do padroado da fundación, formulou solicitude de clasificación para efectos da súa inscrición no Rexistro de Fundacións de Interese Galego.

2. A Fundación Club Financiero de Santiago foi constituída en escritura pública outorgada en Santiago de Compostela, o 17 de novembro de 2011, ante o notario José Manuel Amigo Vázquez, co número de protocolo 2.127, polo Club Financiero de Santiago, S.A., representado por Roberto Pereira Costa.

3. Segundo consta no artigo 6 dos seus estatutos, a fundación ten por obxecto o fomento da economía social e produtiva de Galicia.

4. O padroado inicial da Fundación está formado Roberto Pereira Costa como presidente, José Ramón García González como vicepresidente, e Ramón Sabín Sabín como secretario.

5. A comisión integrada polos secretarios xerais de todas as consellerías eleva ao conselleiro de Presidencia, Administracións Públicas e Xustiza proposta de clasificación como de interese para o fomento da economía social e produtiva de Galicia da Fundación Club Financiero de Santiago, con base nas materias que constitúen o seu obxecto fundacional.

6. Na escritura de constitución consta a identidade dos fundadores, a dotación inicial, os estatutos e a identificación dos membros do padroado.

7. De conformidade co artigo 51 do Decreto 14/2009, do 21 de xaneiro, polo que se aproba o Regulamento de fundacións de interese galego, e segundo proposta da comisión de secretarios, procede a súa clasificación como de interese para o fomento da economía social e produtiva de Galicia, e a súa adscrición á Consellería de Economía e Industria.

Consideracións legais:

1. O artigo 34 da Constitución española recoñece o dereito de fundación para fins de interese xeral de acordo coa lei, e o artigo 27.26 do Estatuto de autonomía de Galicia establece competencia exclusiva sobre o réxime das fundacións de interese galego.

2. A escritura de constitución da fundación contén os datos exixidos na Lei 12/2006, do 1 de decembro, de fundacións de interese galego.

3. Segundo establece o artigo 7 do Decreto 15/2009, do 21 de xaneiro, polo que se aproba o regulamento do rexistro de fundacións de interese galego, corresponde á Consellería de Presidencia, Administracións Públicas e Xustiza, a clasificación da fundación e a adscrición á consellería correspondente, que exercerá as funcións de protectorado.

De conformidade co exposto, e considerando que se cumpren as condicións establecidas pola normativa vixente en materia de fundacións de interese galego, de acordo coa proposta realizada pola Comisión de Secretarios Xerais, na súa reunión do día 19 de decembro de 2011,

DISPOÑO:

Clasificar de interese para o fomento da economía social e produtiva de Galicia a Fundación Club Financiero de Santiago, e adscribila ao protectorado da Consellería de Economía e Industria.

Contra esta orde que pon fin á vía administrativa, pode interpoñerse recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, de conformidade co disposto na Lei 29/1998, do 13 de xullo, reguladora da xurisdición contencioso-administrativa, podendo interpoñer con carácter potestativo recurso de reposición ante o mesmo órgano que ditou o acto, no prazo dun mes, segundo o disposto na Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 22 de decembro de 2011.

Alfonso Rueda Valenzuela
Conselleiro de Presidencia, Administracións Públicas e Xustiza