O obxecto da Orde do 27 de abril de 2010 é establecer as bases reguladoras xerais para a concesión, en réxime de concorrencia competitiva, de axudas a proxectos colectivos de acondicionamento mariño e rexeneración, financiados polo FEP, que permitan mellorar a produtividade dos bancos marisqueiros con problemas de perda de produción e que contribúan de forma sustentable a mellorar a xestión e conservación dos recursos mariños vivos.

O artigo 24 da citada orde recolle a necesidade de que os beneficiarios das axudas presten garantías para a expedición de anticipos ou pagamentos parciais, nos supostos alí recollidos.

A situación económica de crise que vive actualmente o sector pesqueiro aconsella, de acordo co disposto no artigo 67 do Decreto 11/2009, do 8 de xaneiro, polo que se aproba o regulamento da Lei 9/2007, do 13 de xuño, de subvencións de Galicia, a modificación da citada Orde da Consellería do Mar do 24 de abril de 2010.

DISPOÑO:

Artigo único.

Modificación do número 3 do artigo 24 da Orde do 27 de abril de 2010 pola que se establecen as bases reguladoras xerais e a convocatoria para o ano 2010 para a concesión, en réxime de concorrencia competitiva, de axudas a proxectos colectivos de acondicionamento mariño e rexeneración, financiados polo Fondo Europeo de Pesca, que permitan mellorar a produtividade dos bancos marisqueiros con problemas de perda de produción e que contribúan de forma sustentable a mellorar a xestión e conservación dos recursos mariños vivos, que queda redactado como segue:

«3. A garantía deberá cubrir o 110% do importe dos anticipos ou pagamentos parciais».

Así mesmo, engádese un número 5 do seguinte teor:

«5. Nos supostos establecidos neste artigo, por razóns xustificadas, e por petición da entidade beneficiaria de acordo co previsto nos artigos 65.2 e 67.4 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, o Consello da Xunta de Galicia poderá autorizar a constitución por importe inferior ao establecido no número 3 deste artigo ou eximir da obriga de constituír garantías».

Disposición derradeira.

Esta orde producirá efectos a partir do día seguinte ao da súa publicación no Diario Oficial de Galicia.

Santiago de Compostela, 18 de novembro de 2011.

Rosa M.ª Quintana Carballo
Conselleira do Mar