O Concello de Cabanas, o 22 de xullo de 2011, solicitou a cesión dunha embarcación en construción no centro de formación A Aixola, para actividades de divulgación e turismo no curso baixo do río Eume.

Os concellos son entidades públicas dotadas de personalidade xurídica e capacidade de obrar, para o cumprimento dos fins e o exercicio das funcións que lles están encomendadas, entre outras a de xestionar e administrar aqueles bens patrimoniais que lles sexan cedidos por outras administracións públicas.

A Lei 3/1985, do 12 de abril, de patrimonio da Comunidade Autónoma de Galicia, permite a cesión de bens mobles da comunidade autónoma sempre que se dediquen a fins de utilidade pública ou interese social, exixindo o Decreto 50/1989, do 9 de marzo, polo que se aproba o regulamento da citada Lei 3/1985, que a orde de cesión exprese a finalidade concreta á cal a entidade beneficiaria debe destinar o ben, así como as súas condicións.

Tal é o caso da embarcación tipo planadora construída no centro de formación A Aixola, no desenvolvemento das prácticas formativas. A Consellería do Mar non vai empregar o dito ben e concorren circunstancias que aconsellan acceder á mencionada solicitude de cesión.

Para tal fin, a Consellería do Mar tramitou o expediente de cesión, de conformidade co disposto no artigo 35.bis da Lei 3/1985, do 12 de abril, de patrimonio da Comunidade Autónoma de Galicia, e no artigo 96.bis do seu regulamento, aprobado polo Decreto 50/1989, do 9 de marzo, modificado polo Decreto 238/1998, do 24 de xullo.

Polo exposto anteriormente e, en uso das facultades que me confiren os artigos 34.6.º e 38 da Lei 1/1983, do 22 de febreiro, de normas reguladoras da Xunta e da súa Presidencia,

DISPOÑO:

Artigo 1.

Acórdase a cesión en propiedade a favor do Concello de Cabanas (A Coruña) do seguinte ben moble:

Embarcación tipo planadora, das seguintes características:

Dimensións: eslora: 7,35 m, manga: 2,78 m, puntal: 0,70 m, arqueo: 2,74 TRB ou 1,98 GT.

Construción: centro de formación A Aixola. Marín (Pontevedra).

Ano de construción: outubro-2010 a xullo-2011.

Material de casco: madeira (taboleiro contrachapado mariño).

Capacidade: 8 + 1 persoas.

Valor actual estimado: 20.000 euros.

Autorización de construción: 13 de decembro de 2010. NIB 385257. Expediente: 2010-474-3141.

Artigo 2.

A cesión queda sometida ás seguintes cláusulas:

a) O ben cedido tal como establecen os artigos 35.bis da Lei 3/1985, de patrimonio da Comunidade Autónoma de Galicia, e 96.bis do Decreto 50/1989, do 9 de marzo, polo que se aproba o seu regulamento, destinarase a fins de utilidade pública ou interese social do Concello de Cabanas (A Coruña), concretamente, á realización de actividades de divulgación e turismo no curso baixo do río Eume.

b) Coa cesión outorgarase ao concello citado a propiedade do ben moble cedido.

c) Se o ben cedido non se aplica ao fin sinalado, se se descoida ou utiliza con grave quebramento, ou se incumpren as condicións do acordo, considerarase resolta a cesión e o ben reverterá na Comunidade Autónoma de Galicia, que terá dereito a percibir, logo da taxación pericial, o valor dos detrimentos ou deterioracións que experimenten.

d) Serán por conta da entidade cesionaria todos os gastos de conservación e mantemento do ben moble cedido, así como obter todas as autorizacións precisas para o seu funcionamento de acordo coa lexislación vixente.

Artigo 3.

A devandita cesión formalizarase mediante acta subscrita polo secretario xeral técnico desta consellería ou funcionario en que delegue, e deberá constar nela o acordo de cesión e a aceptación do cesionario.

Disposición derradeira primeira.

A Consellería do Mar, a través da secretaría xeral técnica, realizará os trámites necesarios para a efectividade de canto se dispón nesta orde.

Disposición derradeira segunda.

Esta orde producirá efectos desde o día seguinte ao da súa publicación no Diario Oficial de Galicia.

Santiago de Compostela, 26 de setembro de 2011.

Rosa M.ª Quintana Carballo
Conselleira do Mar