A Lei 3/1985, do 12 de abril, de patrimonio da Comunidade Autónoma de Galicia, permite a cesión de bens mobles da comunidade autónoma sempre que se dediquen a fins de utilidade pública ou interese social, e o Decreto 50/1989, polo que se aproba o regulamento da citada Lei 3/1985, exixe que a orde de cesión exprese a finalidade concreta a que a entidade beneficiaria debe destinar os bens, así como as súas condicións.
Por outra banda, a Lei 6/2009, do 11 de decembro, de modificación da Lei 11/2008, do 3 de decembro, de pesca de Galicia, define as confrarías de pescadores de Galicia como corporacións de dereito público, sen ánimo de lucro, dotadas con personalidade xurídica e capacidade de obrar para o cumprimento dos seus fins, que actúan como órganos de consulta e colaboración da Administración da Comunidade Autónoma de Galicia en materias relativas á actividade extractiva e á ordenación do sector pesqueiro, e dispón que se rexerán pola súa lexislación específica.
Na actualidade, a embarcación Illas Sisargas consta inscrita a favor da Xunta de Galicia no Rexistro Marítimo Español, provincia marítima da Coruña, distrito marítimo de Corme, con matrícula 8.ª CO-3-2, coas características seguintes:
Nome da embarcación: Illas Sisargas.
Ano de construción: 1983.
Tipo de embarcación: especiais.
Subtipo de embarcación: vixilancia.
Motor: YAMAHA modelo ME200FT núm. 72W0000320 de potencia KW/CV 45,60/62,02.
Dimensións: manga 2,60, eslora 7,60, puntal 1,40.
T.R.B.: 5,03.
Folio: 2/.
Lista: 8.
Ano de inscrición: 1990.
O 13 de xuño de 2011 a Confraría de Pescadores de Malpica de Bergantiños solicitou a cesión en propiedade da referida embarcación de vixilancia.
Debido a que a referida confraría destina a embarcación Illas Sisargas para fins de utilidade pública e de interese social, de xeito especial, á realización de vixilancia no ámbito territorial determinado polos respectivos estatutos e á colaboración en asuntos de salvamento marítimo e loita contra a contaminación, cómpre cederlle en propiedade a embarcación Illas Sisargas, adscrita a esta consellería, para ser destinada aos fins sinalados.
Por outro lado, dado que carece de fins lucrativos, considérase axeitado provela da dita embarcación para o fortalecemento da súa estrutura.
En consecuencia, de conformidade co previsto no artigo 27, números 15 e 29, do Estatuto de autonomía de Galicia e no uso das facultades que me confire o artigo 35 bis da Lei 3/1985, do 12 de abril, de patrimonio de Galicia, e no uso das competencias que me confire a Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO
Artigo 1.
Acórdase a cesión en propiedade á Confraría de Pescadores de Malpica de Bergantiños (A Coruña) da seguinte embarcación:
Nome da embarcación: Illas Sisargas.
Ano de construción: 1983.
Tipo de embarcación: especiais.
Subtipo de embarcación: vixilancia.
Motor: Yamaha modelo ME200FT núm. 72W0000320 de potencia KW/CV 45,60/62,02
Dimensións: manga 2,60, eslora 7,60, puntal 1,40.
T.R.B.: 5,03.
Folio: 2/.
Lista: 8.
Matrícula: 8.ª CO-3-2.
Ano de inscrición:1990.
Artigo 2.
A cesión sinalada no artigo anterior queda sometida ás seguintes claúsulas:
a) De conformidade co establecido polos artigos 35 bis da Lei 3/1985, do patrimonio da Comunidade Autónoma de Galicia, e 96 bis do Decreto 50/1989, polo que se aproba o seu regulamento, o ben cedido destinarao a confraría cesionaria a fins de utilidade pública ou de interese social, de xeito especial, á realización de vixilancia no ámbito territorial determinado polos respectivos estatutos e á colaboración en asuntos de salvamento marítimo e loita contra a contaminación.
b) Coa cesión outórgaselle á Confraría de Pescadores de Malpica de Bergantiños (A Coruña) a propiedade do ben moble cedido.
c) Serán por conta da entidade cesionaria todos os gastos de conservación e mantemento do ben moble cedido.
d) Serán causas de resolución da cesión acordada, revertendo o ben ao patrimonio da Comunidade Autónoma de Galicia, que terá dereito a percibir, logo da taxación pericial, o valor do detrimento ou deterioración que aquel experimentase, as seguintes:
– A non aplicación do ben cedido ao fin sinalado na letra a) deste artigo.
– A súa utilización con grave quebrantamento.
– En xeral, o incumprimento das condicións de cesión.
Artigo 3.
A devandita cesión formalizarase mediante acta subscrita polo secretario xeral técnico desta consellería ou funcionario en quen delegue, debendo constar nela o acordo de cesión e a aceptación do cesionario.
Disposición derradeira primeira.
Facúltase o secretario xeral técnico da Consellería do Mar para ditar as instrucións precisas para a execución do disposto nesta orde.
Disposición derradeira segunda.
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 14 de setembro de 2011.
Rosa M.ª Quintana Carballo
Conselleira do Mar
