O representante legal do centro autorizado de ensinanzas elementais de música Manuel Peleteiro, do concello de Santiago de Compostela, solicita o cambio de domicilio por traslado de instalacións da rúa San Pedro de Mezonzo, 27, a Monte Redondo, O Castiñeiriño; e tamén solicita autorización para impartir as ensinanzas artísticas profesionais de música.

A Xefatura Territorial da Consellería de Educación e Ordenación Universitaria da Coruña achega o expediente cos correspondentes informes, de conformidade co Real decreto 303/2010, do 15 de marzo, polo que se establecen os requisitos mínimos dos centros que impartan ensinanzas artísticas reguladas na Lei orgánica 2/2006, do 3 de maio, de educación; co Decreto 253/1995, do 29 de setembro, de autorización a centros docentes privados para impartir ensinanzas artísticas, e coa Orde do 5 de decembro de 1995, que o desenvolve.

Por isto, por proposta da Dirección Xeral de Centros e Recursos Humanos,

DISPOÑO:

Primeiro.

1. Autorizar o cambio de domicilio por traslado de instalacións ao centro autorizado de ensinanzas elementais de música e autorizar as ensinanzas artísticas profesionais de música, no centro que se detalla a continuación:

Denominación: centro autorizado de ensinanzas artísticas profesionais de música Manuel Peleteiro.

Código do centro: 15027484.

Enderezo: Monte Redondo, O Castiñeiriño.

Concello: Santiago de Compostela.

Provincia: A Coruña.

Titular: Herederos de Manuel Peleteiro, S.C.

2. Composición resultante:

Ensinanzas elementais de música.

Ensinanzas artísticas profesionais de música.

Segundo. Para a posta en funcionamento das ensinanzas que se autorizan a Xefatura Territorial da Consellería de Educación e Ordenación Universitaria da Coruña, logo do informe do Servizo Territorial de Inspección Educativa, aprobará expresamente a relación de persoal que impartirá docencia.

Terceiro. O centro queda obrigado ao cumprimento da normativa vixente e a solicitar a oportuna revisión cando teña que modificarse calquera dos datos que se sinalan nesta orde.

Contra esta orde, que esgota a vía administrativa, as persoas interesadas poderán formular recurso potestativo de reposición ante esta consellería, no prazo dun mes, contado a partir do día seguinte ao da súa publicación no Diario Oficial de Galicia, segundo o disposto nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común ou ben, directamente, o recurso contencioso-administrativo no prazo de dous meses desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 26 de xullo de 2011.

Jesús Vázquez Abad
Conselleiro de Educación e Ordenación Universitaria