O 23 de maio de 2003, o presidente de Portos de Galicia acordou a adxudicación do concurso aberto para a selección dunha oferta para a tramitación dunha concesión de ocupación de dominio público portuario do porto de Moaña para a construcción e explotación de instalacións para a navegación recreativa, a favor da entidade Club Social Moaña Mar, autorizando o inicio da tramitación correspondente de acordo co previsto na lexislación vixente en materia de concesións no dominio público marítimo-terrestre.

Polo que, de acordo coa lexislación vixente, se fai público o proxecto de instalacións para a navegación recreativa en Moaña subscrito en xuño de 2003 polo enxeñeiro de camiños, canles e portos Jesús Moro Mora para que entidades, corporacións ou particulares interesados poidan presentar por escrito as reclamacións que consideren oportunas, no prazo de trinta (30) días hábiles, contados a partir do seguinte ó da publicación deste anuncio no Diario Oficial de Galicia, nos servicios centrais do ente público Portos de Galicia, sitos na praza de Europa 5 A-6º polígono das Fontiñas, 15707 Santiago de Compostela, onde poderán examina-la documentación correspondente durante o prazo indicado e nos días hábiles de nove a catorce horas.

Así mesmo, e en cumprimento dos acordos existentes coa Consellería de Medio Ambiente e durante o prazo de trinta (30) días hábiles, o órgano substantivo someterá o estudio de impacto ambiental ó trámite de información pública, mediante anuncio no Diario Oficial de Galicia.

Na súa virtude, sométese a información pública o estudio de impacto ambiental do proxecto de instalacións para a navegación recreativa en Moaña, situado no concello de Moaña, provincia de Pontevedra.

Para os efectos informativos, poranse ó dispor dos administrados exemplares nas seguintes dependencias:

-Ente público Portos de Galicia, servicios centrais.

-Delegación Provincial da Consellería de Medio Ambiente na provincia de Pontevedra.

-Concello de Moaña.

As alegacións formularanse durante un prazo de trinta (30) días contados a partir do seguinte á publicación deste anuncio no Diario Oficial de Galicia.

Santiago de Compostela, 11 de decembro de 2003.

Carlos Negreira Souto

Presidente do ente público Portos de Galicia