O Pleno do Concello, en sesión do día 25 de setembro de 2003 adoptou, entre outros, o seguinte acordo:

Primeiro.-Desestimar, polos motivos expostos nos informes técnico e xurídico, e en harmonía con eles, as alegacións presentadas por María Vasco Pérez e Eduardo Canabal Sanz.

Segundo.-Aprobar definitivamente o devandito estudio de detalle promovido por Profaro Terrenos, S.L., representada por Juan Lago Pérez, para reaxusta-las aliñacións e rasantes e ordena-los volumes do ámbito das antigas naves de Regojo, sen introducir ningunha modificación respecto do documento aprobado inicialmente pola Comisión de Goberno na súa sesión do 6 de marzo de 2003.

Terceiro.-Instar da Secretaría do Concello a dilixencia de tódolos planos e documentos do instrumento urbanístico, na que se faga consta-lo acordo recaído.

Cuarto.-Publicar no DOG e no BOP o acordo de aprobación definitiva, e notificarlles ós interesados con sinalamento dos recursos procedentes.

Quinto.-Comunicarlle ó conselleiro de Política Territorial, Obras Públicas e Vivenda o presente acordo, dándolle traslado dunha copia autenticada do expediente administrativo completo e dous exemplares do instrumento aprobado definitivamente, debidamente dilixenciados, para efectos da súa entrada en vigor.

Sexto.-Advertir á propiedade que deberá constituír unha servidume de paso que garanta o uso público do espacio situado entre os bloques 2 e 6.

Faise constar, por medio deste anuncio, a remisión á Consellería de Política Territorial, Obras Públicas e Vivenda do documento completo do estudio de detalle, dándolle traslado dunha copia autenticada do expediente administrativo e dous exemplares do instrumento aprobado definitivamente con tódolos planes e documentos que o integran debidamente dilixenciados.

O que se fai público de conformidade co disposto no artigo 92.2º da Lei 9/2002, do 30 de decembro, de ordenación urbanística e protección do medio rural de Galicia.

Contra o devandito acordo, que pon fin á vía administrativa, poderase interpoñer, con carácter potestativo, recurso de reposición, perante o órgano que o dictou, no prazo dun mes, ou directamente recurso contencioso-administrativo ante o Tribunal Superior de Xustiza de Galicia, no prazo de dous meses, ámbolos dous prazos contados desde o día seguinte ó da publicación deste anuncio no BOP ou no Diario Oficial de Galicia.

Redondela, 18 de novembro de 2003.

Xaime Rei Barreiro

Alcalde