Dentro do plan de actividades da Escola Galega de Administración Pública para o 2003 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas xornadas sobre aspectos xurídico-económicos e fiscais das fundacións, convocatoria que se desenvolverá conforme as seguintes bases:

1. Obxectivos.

O sector das entidades que operan sen ánimo de lucro -as que os anglosaxóns coñecen como non profit

organisations- alcanza unha crecente presencia na vida social e suscita cada vez maior interese entre operadores sociais e económicos, funcionarios, universitarios, profesionais e público en xeral.

Estas xornadas tratan de dar unha visión, ó tempo, técnica e práctica dos aspectos patrimoniais e fiscais que se refiren ás fundacións, á vista da recente regulamentación destas persoas xurídicas na súa lei estatal propia e na lexislación sobre mecenado.

2. Contido.

Trataranse estes temas:

-As fundacións de interese galego.

-A dotación da fundación.

-O réxime do patrimonio fundacional.

-O exercicio de actividades económicas pola fundación.

-O control do protectorado sobre o patrimonio e sobre as actividades económicas da fundación.

-O réxime fiscal das fundacións.

-O réxime fiscal do mecenado a favor de fundacións.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos da Delegación da Consellería da Presidencia, Relacións Institucionais e Administración Pública na Coruña (praza de Pontevedra, s/n, da citada cidade), os días 18 e 19 de decembro de 2003.

5. Inscrición.

-Prazo: remata o martes, día 16 de decembro de 2003.

-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando por teléfono, o día 17 de decembro, das 8.30 ás 14.30 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir

no desenvolvemento das xornadas, así como o de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente

a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 26 de novembro de 2003.

Domingo Bello Janeiro

Director da Escola Galega de Administración Pública

CONSELLERÍA DA PRESIDENCIA, RELACIÓNS INSTITUCIONAIS

E ADMINISTRACIÓN PÚBLICA