Dentro do Plan de actividades da Escola Galega de Administración Pública para 2003, e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócanse, en colaboración coa Consellería de Innovación, Industria e Comercio, unhas Xornadas sobre deseño industrial, convocatoria que se desenvolverá conforme as seguintes bases:
1. Obxectivos.
Analizar en profundidade a nova Lei 20/2003, do 7 de xullo, sobre protección xurídica do deseño industrial, que regula unha materia de extraordinaria actualidade e interese tanto a nivel nacional como para Galicia. A lei rexe a complexa figura do deseño, que é a aparencia externa dos productos industriais ou de artesanía. Estamos ante unha lei que abre un camiño áxil e efectivo para protexer xuridicamente as creacións que se materializan na forma exterior dos productos dos máis variados sectores, como a moda e os seus complementos (bolsos, zapatos, cintos, anteollos, etc.), o moble, os xoguetes, os automóbiles, os electrodomésticos, a informática, o enxoval do fogar (cubertos, vaixelas, mantelerías) e outros. Para Galicia a lei é moi importante, porque é unha das comunidades autónomas con notable presencia no mundo do deseño, en sectores como os xa indicados da moda, os constructores de automóbiles, vivamente interesados polos deseños das carrocerías. Tamén a artesanía galega é
relevante, polo que parece conveniente difundir no eido da nosa Comunidade Autónoma a nova protección que brinda a Lei 20/2003.
2. Contido.
Trataranse estes temas:
-Concepto legal de deseño e requisitos de protección.
-O deseño e a propiedade intelectual.
-O deseño comunitario.
-O deseño e as pezas de reparación dos automóbiles.
-Aspectos procesuais da Lei do deseño.
-Propiedade industrial: actuacións da Consellería de Innovación, Industria e Comercio
-O deseño non rexistrado.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos da EGAP (polígono das Fontiñas, rúa de Madrid, 2-4, Santiago de Compostela), os días 11 e 12 de decembro de 2003.
5. Inscrición.
-Prazo: remata o martes día 9 de decembro de 2003.
-Tramitación de solicitudes: as solicitudes irán dirixidas ó director da Escola Galega de Administración Pública; polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 10 de decembro, das 8.30 ás 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como o de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase neste documento a natureza da actividade e as datas da súa realización.
Santiago de Compostela, 11 de novembro de 2003.
Domingo Bello Janeiro
Director da Escola Galega de Administración
Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA
