O Instituto Galego da Vivenda e Solo subscribiu con data do 28 de febreiro de 1991 un acordo co Concello do Pereiro de Aguiar para a promoción pública dun parque empresarial en dito municipio.

Foi formulado o oportuno Plan parcial de ordenación do parque empresarial, que foi aprobado definitivamente por acordo da Comisión Provincial de Urbanismo o 5 de novembro de 1993.

O proxecto de urbanización do parque empresarial foi aprobado definitivamente por acordo do Pleno municipal en sesión do 26 de febreiro de 1994.

O Consello da Xunta de Galicia, con data do 13 de maio de 1994, declarou expresamente a prevalencia da utilidade pública da implantación do parque empresarial do Pereiro de Aguiar sobre a do monte veciñal en man común Monte Alegre da Comunidade de Cachamuíña no termo municipal do Pereiro de Aguiar.

O Pleno da corporación municipal, en sesión do 9 de febreiro de 1996, aprobou definitivamente a primeira modificación puntual do Plan parcial do parque empresarial do Pereiro de Aguiar. En sesión extraordinaria do Concello en pleno do 5 de outubro de 2001, aprobou definitivamente a segunda modificación do Plan parcial do devandito parque. Esta modificación subdivide en dous polígonos o polígono 2, o 2 A e o 2 B, sendo prioritario o primeiro.

Determinouse como sistema de actuación o da expropiación, que realizará o Instituto Galego da Vivenda e Solo, de conformidade cos acordos subscritos co Concello.

A aprobación dos instrumentos de ordenación urbanística implicará a declaración de utilidade

pública das obras e a necesidade de ocupación dos bens e dereitos afectados ós fins da expropiación, segundo o establecido no artigo 33 da Lei 6/1998, do 13 de abril, sobre réxime do solo e valoracións e no artigo 98 da Lei 9/2002, do 30 de decembro, de ordenación urbanística e protección do medio rural de Galicia.

Este expediente ten por obxecto a expropiación polo Instituto Galego da Vivenda e Solo en beneficio de Xestión Urbanística de Ourense, S.A. dos bens e dereitos necesarios para a execución do polígono nº 2 A do parque empresarial do Pereiro de Aguiar. Trátase dunha expropiación urbanística e, como tal, regulada na Lei 6/1998, de réxime do solo e valoracións (LRSV), na Lei 9/2002, do 30 de decembro, de ordenación urbanística e protección do medio rural de Galicia, e no Real decreto 3288/1978, do 25 de agosto, que aproba o Regulamento de xestión urbanística (RXU). Así mesmo, conforme a disposición adicional décimo primeira da Lei 1/1991, do 15 de xaneiro, da Xunta de Galicia, as administracións urbanísticas competentes pódenlle adxudicar directamente a formulación e execución de programas de actuación e plans de ordenación mediante os acordos ou concesións que para o efecto establezan, e para levar a cabo as actuacións de adquisición de solo terá a condición de beneficiaria da

expropiación que estas administracións leven a cabo.

As facultades e obrigas do beneficiario da expropiación son as establecidas no artigo 5.2º da Lei de expropiación forzosa.

Para os efectos de fixación do prezo xusto polo procedemento de taxación conxunta, para o seu pagamento ós propietarios afectados e ocupación dos predios afectados Xestión Urbanística de Ourense, S.A., como beneficiaria da expropiación, confeccionou o oportuno expediente, de acordo co disposto no artigo 36 da Lei 6/1998, do réxime do solo e valoracións, artigo 143 da Lei 9/2002, do 30 de decembro, de ordenación urbanística e protección do medio rural de Galicia e artigos 201 e 202 do Regulamento de xestión urbanística.

O artigo 199.1º do RXU establece que «a execución do Plan polo sistema de expropiación nun polígono ou unidade de actuación determinado requirirá que a Administración actuante, ademais de proceder á delimitación do seu ámbito territorial, formule, conforme o previsto na lexislación de expropiación forzosa, unha relación dos propietarios existentes no dito ámbito, coa descrición dos bens e dereitos afectados».

O artigo 17.1º da Lei de expropiación forzosa establece que o beneficiario da expropiación estará obrigado a formula-la relación concreta e individualizada, na que se describan en tódolos seus aspectos, material e xurídico, os bens e dereitos que considere de necesaria expropiación.

O artigo 36 LRSV establece que «o prezo xusto dos bens e dereitos expropiados determinaranse con

forme o establecido no título III desta lei, mediante expediente individualizado ou polo procedemento de taxación conxunta».

Así mesmo, o artigo 142.2º da Lei 9/2002, do 30 de decembro, de ordenación urbanística e protección do medio rural de Galicia, establece que a «a Administración actuante poderá aplica-lo procedemento de taxación conxunta ou segui-la expropiación individualmente»; e o artigo 201 do RXU establece que: «1. No sistema de expropiación, o expropiante poderá optar entre segui-la expropiación individualizadamente para cada predio ou aplica-lo procedemento de taxación conxunta.-... 3. Se o órgano urbanístico optase polo procedemento de taxación conxunta, seguirase a tramitación regulamentada nos artigos seguintes».

Tratándose dunha expropiación urbanística, este expediente formúlase polo procedemento de taxación conxunta, ó abeiro do devandito artigo 142.2º da Lei 9/2002, do 30 de decembro, de ordenación urbanística e protección do medio rural de Galicia.

Na súa virtude acórdase o inicio do expediente de expropiación forzosa polo procedemento de taxación conxunta dos bens e dereitos afectados polo proxecto de expropiación para a execución do Plan parcial do parque empresarial do Pereiro de Aguiar en beneficio de Xestur-Ourense, conforme á modificación aprobada definitivamente polo Pleno do Concello en sesión extraordinaria do 5 de outubro de 2001.

De conformidade co previsto no artigo 143 da Lei 9/2002, do 30 de decembro, de ordenación urbanística e protección do medio rural de Galicia, sométese a información pública o expediente de expropiación dos bens e dereitos que se precisan ocupar para a construcción do polígono 2 A do parque empresarial do Pereiro de Aguiar, para que quen poida resultar interesado formule as observacións e reclamacións que coide convenientes, en particular no que concerne á titularidade ou valoracións dos seus respectivos dereitos. Acórdase a súa publicación no Diario Oficial de Galicia e nun xornal dos de maior circulación na provincia. Así mesmo, as taxacións notificaranse individualmente ós que aparezan como titulares de bens e ou dereitos no expediente, para que poidan formula-las alegacións no prazo dun mes, contados a partir da data de notificación, e ó Concello no termo do cal radiquen os bens que se vaian expropiar para que o fixe no taboleiro de anuncios e efectos do disposto no artigo 143.5º

da Lei 9/2002, do 30 de decembro, de ordenación urbanística e protección do medio rural de Galicia.

O expediente está exposto nas oficinas de Xestión Urbanística de Ourense, S.A., sitas na rúa Curros Enríquez, nº 1, planta 8ª de Ourense, e as alegacións, poderán presentarse no rexistro desta ou no rexistro da delegación en Ourense do Instituto Galego da Vivenda e Solo, sita na rúa Sáenz Díez nº1 de Ouren

se C.P. 32071, ou en calquera das formas previstas no artigo 38.4º da Lei 30/1992, de réxime xurídico das administracións públicas e do procedemento administrativo común.

Este anuncio servirá de notificación nos termos do artigo 59º da Lei 30/1992, do 26 de novembro, de réxime xurídico das administracións públicas e do procedemento administrativo común, para tódolos propietarios e interesados directamente afectados que, por resultaren descoñecidos ou por ignorarse

o seu domicilio, non poidan ser notificados individualmente.

O que se fai público para xeral coñecemento e dos propietarios dos terreos, bens e dereitos afectados, a relacións dos cales se xunta como anexo a esta resolución.

Santiago de Compostela, 26 de setembro de 2003.

José Antonio Redondo López

Director xeral do Instituto Galego

da Vivenda e Solo

Relación de propietarios afectados pola expropiación do Pereiro de Aguiar 2ª