A Universidade de Santiago de Compostela solicitou os elementos que integran unha unidade de cobaltoterapia Theratron 780C, así como tres tubos de raios X, propiedade do Servicio Galego de Saúde, e que se atopan en desuso no Complexo Hospitalario Universitario de Santiago de Compostela. O Sergas considera necesario cederlle-la propiedade coa finalidade de destinalos ós fins de utilidade pública ou interese social do servicio público que desenvolve a universidade mediante o estudio, a docencia e a investigación.
O Servicio Galego de Saúde tramitou o expediente de cesión da dita unidade de cobaltoterapia, así como dos tres tubos de raios X, de conformidade co disposto no artigo 35 bis da Lei 3/1985, do 12 de abril, do patrimonio da Comunidade Autónoma galega, modificado polo artigo 18 da Lei 7/2002, do 27 de decembro, de medidas fiscais e de réxime admi
nistrativo (DOG nº 251, do 30 de decembro), e no artigo 96 bis do seu regulamento, aprobado polo Decreto 50/1989, do 9 de marzo, engadido polo Decreto 238/1998, do 24 de xullo (DOG nº 156, do 13 de agosto).
Por todo o exposto e en uso das facultades que me confire o artigo 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro
DISPOÑO:
Artigo 1º.-Obxecto.
Esta orde ten por obxecto acorda-la cesión do material que se relaciona a continuación en favor da Universidade de Santiago de Compostela:
Unidade de cobaltoterapia:
-Unidade de irradiación de Co60 Theratron 780C, xunto coa consola de control.
-Mesa de tratamento.
-Láseres de posicionamento.
-Monitor de radiación ambiental.
-Cámara de vídeo e monitor de visualización.
-Porta blindada do búnker.
Tubos de raios X:
-CGR.
-Carcasa Statorix 240-90.
-Tubo modelo MSN742.
-S/N 85409.
-CGR.
-Carcasa Statorix 240-90.
-Tubo modelo MSN740.
-S/N 10562TX7.
-Tubo de CT modelo 46-27410061.
-S/N 51498CX4.
Artigo 2º.-Cláusulas de cesión.
A cesión queda sometida ás seguintes cláusulas:
a) Os bens cedidos destinaranse ós labores de investigación que realiza a universidade de acordo coa utilidade pública ou interese social do servicio público que desenvolve mediante o estudio, a docencia e a investigación, tal e como esixe o artigo 35 bis da Lei 3/1985, do 12 de abril, do patrimonio da Comunidade Autónoma galega e o artigo 96 bis do seu regulamento, aprobado polo Decreto 50/1989, do 9 de marzo.
b) A cesión outórgalle á universidade a propiedade dos elementos detallados no artigo 1º.
c) Os bens cedidos destinaranse a fins de utilidade pública ou interese social do servicio público que presta a universidade mediante o estudio, a docencia e a investigación.
Artigo 3º.-Formalización da cesión.
A cesión formalizarase mediante acta subscrita polo secretario xeral do Servicio Galego de Saúde, de acordo co disposto no artigo 4.6º do Decreto 45/2002, do 8 de febreiro, e o órgano competente da Universidade de Santiago de Compostela, debendo constar nela o acordo de cesión, no que se incluirá a relación de bens obxecto de cesión e a aceptación do cesionario.
Disposición derradeira
Primeira.-O Servicio Galego de Saúde, a través do seu órgano competente, realizará os trámites necesarios para a efectividade de canto se dispón na presente orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 4 de setembro de 2003.
José María Hernández Cochón
Conselleiro de Sanidade
