Polo Decreto 8/2003, do 18 de xaneiro, modificouse a estructura orgánica da Xunta de Galicia. A concordancia da denominación da Consellería de Familia, Xuventude e Voluntariado cos órganos superiores en que se estructura esta e coas competencias atribuídas a eles, aconsellan a modificación da súa denominación, de xeito que nela se inclúa a correspondente ó ámbito competencial do deporte, consonte a súa concepción constitucional e estatutaria, concepción que vén poñer de manifesto a transcendencia sociolóxica, política e económica do fenómeno deportivo.
Por todo iso, en virtude das atribucións que me confire o artigo 26, punto 1 da Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro,
DISPOÑO:
Artigo único.-Modifícase o artigo 1 do Decreto 8/2003, do 18 de xaneiro, polo que se modifica a estructura orgánica da Xunta de Galicia, que queda redactado nos seguintes termos:
«A Xunta de Galicia estará integrada polos departamentos que a seguir se relacionan:
-Consellería da Presidencia, Relacións Institucionais e Administración Pública.
-Consellería de Economía e Facenda.
-Consellería de Política Territorial, Obras Públicas e Vivenda.
-Consellería de Educación e Ordenación Universitaria.
-Consellería de Innovación, Industria e Comercio.
-Consellería de Política Agroalimentaria e Desenvolvemento Rural.
-Consellería de Cultura, Comunicación Social e Turismo.
-Consellería de Sanidade.
-Consellería de Pesca e Asuntos Marítimos.
-Consellería de Xustiza, Interior e Administración Local.
-Consellería de Familia, Xuventude, Deporte e Voluntariado.
-Consellería de Medio Ambiente.
-Consellería de Asuntos Sociais, Emprego e Relacións Laborais.
-Consellería de Emigración».
Disposicións adicionais
Primeira.-A orde de prelación das consellerías manterase segundo o establecido no artigo único deste decreto.
Segunda.-Tódalas referencias á Consellería de Familia, Xuventude e Voluntariado así como á conselleira de Familia, Xuventude e Voluntariado contidas en resolucións e disposicións vixentes, deberán entenderse referidas á Consellería de Familia, Xuventude, Deporte e Voluntariado e á súa titular.
Disposición derradeira
Única.-Este decreto entrará en vigor o mesmo día da súa publicación no Diario Oficial de Galicia.
Santiago de Compostela, dezasete de xuño de dous mil tres.
Manuel Fraga Iribarne
Presidente
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA