Dentro do programa de actividades da EGAP para 2003, e conforme as funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse en colaboración coa Consellería de Política Agroalimentaria e Desenvolvemento Rural os cursos que figuran no anexo, que deberán desenvolverse segundo as seguintes bases:
Primeira.-Solicitudes.
As solicitudes de admisión para os cursos, segundo o modelo que figura ó final da convocatoria, dirixiranse ó Centro de Formación, Investigación e Tecnoloxía Agraria de Galicia, e presentaranse no rexistro xeral da Consellería de Política Agroalimentaria e Desenvolvemento Rural e ou en calquera das súas delegacións provinciais sen prexuízo do disposto no
artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.
Segunda.-Prazo.
O prazo de presentación de solicitudes será de 30 días hábiles e comezará a contar a partir do día seguinte ó da publicación desta resolución no DOG.
Terceira.-Selección.
Os criterios de selección serán os que figuran no anexo, segundo as características de cada curso, e respectarán en todo caso os criterios selectivos sinalados con carácter xeral na Resolución, do 27 de xuño de 1994 (DOG nº 149, do 3 de agosto).
Cuarta.-Certificado de asistencia.
Outorgaráselle-lo correspondente certificado de asistencia ós alumnos que participen con regularidade e dedicación o curso.
É obrigatoria a asistencia e puntualidade a tódalas sesións do curso. Toda ausencia deberá ser xustificada debidamente polo interesado. A falta de asistencia, aínda que sexa xustificada, a máis do 15% das horas lectivas programadas, impedirá a expedición da certificación anteriormente referida e dará lugar á baixa no curso coa perda de tódolos dereitos.
Santiago de Compostela, 11 de xuño de 2003.
Domingo Bello Janeiro
Director da Escola Galega de Administración Pública
ANEXO I
Curso: Xestión de residuos agrarios: instalacións agrarias adaptadas ó tratamento de residuos.
1. Obxectivos:
Analiza-la problemática do almacenamento de residuos agrarios, vendo as diferentes solucións e alternativas con base en diferentes modelos prácticos.
2. Destinatarios:
Técnicos agrarios dos grupos A e B que realicen a súa actividade na Administración e técnicos de AXE e de entidades asociativas gandeiras.
3. Criterios de selección:
1º Persoal da Administración dos grupos A e B, relacionado co tema.
2º Técnicos de AXE e de entidades asociativas agrarias, relacionados co tema.
4. Desenvolvemento:
4.1. Duración: 40 horas.
4.2. Lugar de realización: Centro de Formación e Experimentación Agraria de Guísamo (Bergondo).
4.3. Datas: do 22 ó 26 de setembro de 2003.
4.4. Horario: de mañá e tarde.
4.5. Prazas: 30.
5. Contido:
Situación actual dos residuos gandeiros. Problemática. Evolución e perspectivas. Diferentes modelos de instalación adaptados ó almacenamento de residuos. Alternativas técnicas adaptadas á problemática de Galicia. Realización práctica dunha impermeabilización.
Curso: A Norma UNE-EN ISO/IEC 17025.
1. Obxectivos:
-Formación do persoal para o mantemento e ampliación da acreditación das diferentes técnicas analíticas segundo a Norma UNE-EN ISO/IEC 17025.
-Cumprimento da norma en canto á obriga de formación continua das persoas que interveñen nas análises.
-Concienciación do persoal da necesidade e obrigatoriedade da acreditación.
2. Destinatarios:
Persoal de laboratorios químicos acreditados ou pendentes de acreditación.
3. Criterios de selección:
Darase prioridade ó persoal do Laboratorio Agrario e Fitopatolóxico de Galicia.
4. Desenvolvemento:
4.1. Duración: 41 horas.
4.2. Lugar de realización: Centro de Formación e Experimentación Agraria de Guísamo (Bergondo).
4.3. Datas: do 6 ó 23 de outubro de 2003.
4.4. Horario: 16.00 a 19.00 horas.
4.5. Prazas: 30.
5. Contido:
-A Norma UNE-EN ISO/IEC 17025: aspectos xerais. Campo de aplicación. Documentos normativos de referencia. Termos e definicións. Requisitos de xestión. Requisitos técnicos.
-Equipamentos de laboratorio: calibración, validación e mantemento. Calibración e mantemento de equipos térmicos e medidores de temperatura. Termopares e sondas PT100. Calibración e mantemento de balanzas. Calibración e mantemento de equipos volumétricos. Calibración e mantemento de espectrofotómetros. Calibración e mantemento de cromatógrafos.
-Validación de métodos de ensaio. Introducción. Informe previo á validación. Precisión. Exactitude. Selectividade. Intervalo de traballo, linealidade. Límite de detección. Límite de cuantificación. Incerteza dos resultados. Informe final.
-Control de calidade. Control de calidade interno. Criterios de aceptación de resultados. Gráficos de control. Ensaios colaborativos. Aplicacións estatísticas para avaliación de resultados.
Curso: Desenvolvemento rural.
1. Obxectivos:
Estudio teórico-práctico de análise de obxectivos e preparación dun programa de desenvolvemento para unha área rural.
2. Destinatarios:
Persoal da Administración da Comunidade Autónoma dos grupos de acción local e axentes de desenvolvemento local.
3. Criterios de selección:
Prioridade ó persoal vinculado a oficinas situadas en ámbitos rurais e na orde que se sinala no número anterior.
4. Desenvolvemento:
4.1. Duración: 25 horas.
4.2. Lugar de realización: Escola Galega de Administración Pública, rúa de Madrid, 2-4, Santiago de Compostela.
4.3. Datas: do 27 ó 31 de outubro de 2003.
4.4. Horario: 9.00 a 14.00 horas.
4.5. Prazas: 25.
5. Contido:
Planificación estratéxica de espacios rurais: metodoloxía, diagnóstico, proposta. Liñas de axuda para o medio rural. Programas europeos para o desenvolvemento das áreas rurais.
Curso: Medidas agroambientais.
1. Obxectivos:
Ampliar e actualiza-los coñecementos nesta materia de técnicos con responsabilidades en programas nos que se contemplan estas medidas.
2. Destinatarios:
Técnicos da Consellería de Política Agroalimentaria e Desenvolvemento Rural.
3. Criterios de selección:
Técnicos da Consellería de Política Agroalimentaria e Desenvolvemento Rual dos grupos A e B, que estean relacionados co tema.
4. Desenvolvemento:
4.1. Duración: 30 horas.
4.2. Lugar de realización: Centro de Formación e Experimentación Agraria de Guísamo (Bergondo).
4.3. Datas: do 3 ó 7 de novembro de 2003.
4.4. Horario: 9.30 a 14.00 e de 15.30 a 17.30 horas.
4.5. Prazas: 30.
5. Contido:
Desenvolvemento substentable. O desenvolvemento rural e as medidas agroambientais. Indicadores agroambientais. Producción integrada e producción ecolóxica. Métodos ambientais de explotación integrada na producción agraria. A multifuncionalidade.
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA