Vista a acta da comisión paritaria de interpretación do convenio colectivo do sector de comercio de materiais de construcción e saneamento, que tivo entrada nesta delegación provincial o día 8-4-2003, subscrita en representación da parte económica pola Asociación Provincial de Empresarios de Materiales para la Construcción y Saneamiento (ASEMACO), e da parte social, polas centrais sindicais UGT e CC.OO., con data do 27-3-2003, de correción de erros da táboa salarial do ano 2003, e no sentido que se fai figurar no texto da devandita acta.
Que ó abeiro do disposto no artigo 105.2º da Lei 30/1992, de réxime xurídico das administracións públicas e do procedemento administrativo común (modificada pola Lei 4/1999, do 13 de xaneiro), as administracións poderán, así mesmo, rectificar en calquera momento, de oficio ou por instancia dos interesados, os erros materiais, de feito ou aritméticos existentes nos seus actos, esta delegación provincial
ACORDA:
Primeiro.-Rectifica-lo erro material sufrido na táboa salarial para o ano 2003 do convenio colectivo de comercio de materiais de construcción e saneamento da provincia de Pontevedra e no sentido, que figura no texto da acta.
Segundo.-Ordena-la súa inscrición no libro de rexistro de convenios colectivos de traballo, existente nesta delegación provincial, e a notificación ás representacións económica e social da comisión negociadora.
Terceiro.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación.
Cuarto.-Dispoñe-la súa publicación no Diario Oficial de Galicia.
Vigo, 13 de maio de 2003.
Joaquín Macías Sánchez
Delegado provincial de Pontevedra
Convenio colectivo do sector do comercio de materiais para a construcción e o saneamento da provincia de Pontevedra.
Acta.
Asistentes:
CC.OO.: Jorge Carneiro Penedo.
UGT: Roberto Puga Hermida.
Representación empresarial: Andrés Sande Rodríguez.
Secretaria de actas: Marta Iglesias Pereira.
En Vigo, nos locais da Confederación de Empresarios de Pontevedra, ás 18.45 horas do día 27 de marzo de 2003, reúnese a comisión paritaria do convenio colectivo de traballo do sector de comercio de materiais para a construcción e o saneamento da provincia de Pontevedra, co obxecto de proceder á corrección de erros da táboa salarial do ano 2003.
Advertido erro na táboa salarial para o ano 2003, do sector de comercio dos materiais para a construcción e o saneamento da provincia de Pontevedra, cómpre face-la seguinte corrección:
Na categoría de delineante-debuxante, onde di: 600,51 euros, debe dicir 776, 46 euros.
Acórdase a súa remisión á autoridade laboral co obxecto do seu rexistro e posterior publicación no DOG e no BOP.
Autorízase a Marta Iglesias Pereira para levar a cabo as xestións necesarias.
Non habendo máis asuntos que tratar, levántase a sesión ás 19 horas do día arriba indicado.