O Concello de Fene, en sesión celebrada o día vintesete de novembro de dous mil dous, aprobou o proxecto de reurbanización da avenida Marqués de Figueroa, 1ª fase, desde o punto quilométrico 0,000 ó 0,196, e na mesma sesión, acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
O Concello de Fene remitiu a documentación complementaria para a correcta tramitación do expediente con data de entrada no rexistro xeral da Consellería de Xustiza, Interior e Administración Local o día dez de abril de dous mil tres.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable. O dito informe tivo entrada no rexistro xeral da Consellería de Xustiza, Interior e Administración Local o día oito de abril de dous mil tres.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, xa que segundo sinala o Concello, esta travesía serve de alternativa de acceso ó concello de Ferrol, ó recoller parte do tráfico de entrada da N-651 e o procedente da autoestrada A-9, provocando unha grande intensidade de circulación, así mesmo presenta un tránsito de peóns constante debido á localización nesta zona de gran cantidade de vivendas e baixos
comerciais, e que debido á carencia de beiravía ou espacio lateral reservado para aparcamento de vehículos e para a circulación de peóns, obriga a estes a invadi-la calzada, o que supón un alto índice de inseguridade para o tráfico peonil e implica un risco real de accidentes.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Administración Local, e logo de deliberación do Consello da Xunta de Galicia na súa reunión do día oito de maio de dous mil tres,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Fene, para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto de reurbanización da avenida Marqués de Figueroa, 1ª fase, desde o punto quilométrico 0,000 ó 0,196.
Santiago de Compostela, oito de maio de dous mil tres.
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Administración
Local