En cumprimento do disposto no artigo 28 do regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto no artigo 60.1º da Lei 30/1992, do 26 de novembro, de réxime xurídico das administracións públicas e do procedemento administrativo común, faise constar que:
O Xurado Provincial de Clasificación de Montes Veciñais en Man Común de Pontevedra dictou a seguinte resolución:
Asistentes:
-Presidente: José A. López Rodríguez (delegado provincial da Consellería de Medio Ambiente).
-Vocais:
Mª Luisa Pardavila Pazos (avogado polo colexio da provincia).
Manuel Francisco Gutiérrez (xefe do Servicio de Montes e Industrias Forestais).
Luis Mª Muíños Vidueira (letrado da Asesoría Xurídica da Xunta).
-Vocais representantes do lugar de Trabanca-Badiña do Concello de Vilagarcía de Arousa.
Manuel Piñeiro Dasilva.
Ramón Bueno Piñeiro.
-Secretaria: Pilar Pita Ponte (xefa de Sección do Servicio Técnico-Xurídico da Delegación de Medio Ambiente).
Na cidade de Pontevedra, sendo as dezasete horas do día 20 de febreiro de 2003, coa asistencia das
persoas ó marxe sinaladas, reúnese na 3ª planta do edificio sito no nº 47 da rúa Benito Corbal o Xurado Provincial de Clasificación de Montes Veciñais en Man Común co obxecto de decidir sobre a clasificación do monte Bouza dos Abalos e Penedo do lugar de Trabanca-Badiña do concello de Vilagarcía de Arousa.
Antecedentes de feito.
Primeiro.-Con data 2 de xullo de 1997, Manuel Piñeiro Dasilva, presidente da Comunidade de Montes Veciñais en Man Común de Trabanca-Badiña, solicitou a clasificación como veciñais en man común dos montes Bouza dos Abalos e Do Penedo da parroquia de Santa Olaia de Arealonga, lugar de Trabanca-Badiña, concello de Vilagarcía de Arousa, presentando levantamento topográfico e documentación histórica acreditativa dos dereitos dos veciños do lugar.
Segundo.-Con data 15-7-1997 e posteriormente 30-9-1997 solicítase a superficie e lindes das parcelas para permiti-la súa correcta identificación, presentando a dita información con data 3-10-1997.
Terceiro.-Na sesión do día 24 de febreiro de 1999, o xurado adoptou o acordo de nomear relator do expediente de clasificación a Teodoro Arribas Serrano.
Cuarto.-Realízanse os informes previos e preceptivos do monte que se vai clasificar.
Quinto.-Cumprida e observada a tramitación legal e regulamentaria esixida, no preceptivo trámite de audiencia presentan alegacións o solicitante e o Concello de Vilagarcía de Arousa.
Sexto.-No prazo esixido conmparecen como interesados: os herdeiros de Rémirez de Esparza, presentando documentación histórica e notas simples informativas; e Mª Carmen Llovo Santos presentando informe con documentación histórica, escritura pública, etc.
Sétimo.-Na reunión celebrada polo Xurado de Montes Veciñais en Man Común o día 3 de abril de 2002, noméase como novo instructor a Manuel Francisco Gutiérrez.
Oitavo.-Vistos os informes previos e preceptivos do Servicio de Montes e Industrias Forestais e efectuada visita ó terreo, os montes obxecto do presente expediente de clasificación, obedecen á seguinte descrición:
Concello: Vilagarcía de Arousa.
Parroquia: Santa Olaia de Arealonga.
Lugar: Trabanca-Badiña.
Nome do monte: Bouza dos Abalos e Penedo.
Cabida total estimada: 2,84 ha.
Localización xeográfica: as coordenadas extremas na cuadrícula UTM son:
Extremo norte: 4717950.
Extremo sur: 4716250.
Extremo leste: 521200.
Extremo oeste: 520800.
No citado monte distínguense dúas parcelas:
Parcela nº 1: Bouza dos Abalos.
Cabida: 0,89 ha. A vexetación consta de mato baixo, abundante rexeneración de Pinus Pinaster Ait e unha ducia de pés adultos da mesma especie.
Lindes:
Norte: predios particulares e camiño ó monte Xiabre.
Sur: antigo camiño ó monte Xiabre.
Leste: predios particulares.
Oeste: predios particulares.
Colindantes:
Norte: Mª Jesús Rubiáns Campos, Manuel Rodríguez Rubiáns.
Leste: Victoria Campos, Manuel Rodríguez Rubiáns.
Oeste: herdeiros de Margarita Patiño, José Isaac Gómez Abalo.
Servidumes:
Atravesada por camiños de Trabanca-Badiña ó monte Xiabre en dous trazados distintos.
Ocupacións:
Obsérvase a presencia de: un depósito de augas, unha canteira abandonada que ocupa máis da metade da parcela no seu desterro, unha vivenda ocupada e en edificación dentro do desterro da canteira, varias chabolas ocupadas e un cercado de bloques e aramado.
Parcela nº 2: Monte Penedo, O Penedo, Pedra Mallariza ou Pedra Malladiza.
Cabida: 1,95 ha parcialmente rasa, na zona norte aparece masa de Pinus pinaster adulto. Ó oeste monte bravo e rexenerado da mesma especie.
Lindes:
Norte: predios particulares, camiño vello de Trabanca a Cea e pista asfaltada separada por muro.
Sur: predios particulares muro por medio.
Leste: predios particulares e predios particulares muro por medio.
Oeste: predios particulares, polígono industrial.
Colindantes:
Norte: Manuel Bentosinos Aguya, Herdeiros Luis Mouriños
Sur: predio Golpelleira (herdeiros de Ballesteros).
Leste: predio Golpelleira (herdeiros de Ballesteros).
Oeste: polígono industrial, Manuel Bentosinos Aguya, Elisa Barreiro García.
Servidumes: atópase atravesada por camiño.
Fundamentos de dereito.
Primeiro.-O Xurado Provincial de Clasificación de Montes Veciñais en Man Común ten a competencia para coñece-los expedientes de clasificación dos montes que teñan tal carácter a teor do establecido no artigo 9 da Lei 13/1989, do 10 de outubro, de montes veciñais en man común.
Segundo.-De conformidade co artigo 1 da Lei 13/1989, do 10 de outubro, de montes veciñais en man común, e no artigo 1 do Decreto 240/1992 do 4 de setembro, cómpre entender por montes veciñais en man común «... os terreos radicados na Comunidade Autónoma de Galicia que, con independencia da súa orixe, as súas posibilidades productivas, o seu aproveitamento actual e a súa vocación agraria pertenzan a agrupación veciñais na súa calidade de grupos sociais e non como entidades administrativas, e os veñan aproveitando consuetudinariamente en réxime de comunidade, sen asignación de cotas, os membros daquelas na súa condición de veciños».
Así, segundo abondosa xurisprudencia, o feito que xustifica a clasificación ou non como veciñal dun determinado monte, en vía administrativa, é a circunstancia de terse ou non demostrado o aproveitamento consuetudinario en man común, prescindindo das cuestions relativas á propiedade e demais dereitos reais.
Á vista da documentación presentada pola entidade promotora do expediente e os informes emitidos polo Servicio de Montes cabe concluír:
Monte Bouza dos Abalos:
Obsérvase unha canteira de aproximadamente a metade da parcela; existe unha vivenda e un uso particular de residencia de varias familias xitanas; un depósito de augas.
Pola reducción da superficie, o tipo de ocupacións, e o feito de que non se puidese constatar ningún sinal de aproveitamento comunal, esta parcela non é susceptible de aproveitamento comunal.
Monte Penedo:
Parcela parcialmente rasa, con pinos de diversas clases de idade, susceptibles de aproveitamento forestal.
Segundo o informe do Servicio de Montes e I.F., non se pode constatar que houbese un uso comunal.
En consecuencia, vista a Lei galega 13/1989, do 10 de outubro, de montes veciñais en man común e o seu regulamento, aprobado por Decreto 260/1992, do 4 de setembro, e demais preceptos legais e regulamentarios de xenérica e específica
aplicación, o instructor propón e de maneira unánime o xurado
ACORDA:
Non clasificar como veciñais en man común os montes Bouza dos Abalos e Penedo por non quedar acreditado o seu aproveitamento veciñal.
Contra a presente resolución que pon fin á vía administrativa, poderase interpoñer recurso de reposición con carácter potestativo perante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo perante o Xulgado do Contencioso-Administrativo de Pontevedra no prazo de dous meses contados desde o día seguinte ó da presente notificación, de acordo co disposto no artigo 116 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, e nos artigos 8 e 46 da Lei 29/1998, do 13 de xullo, reguladora da xurisdicción contencioso-administrativa.
Pontevedra, 25 de marzo de 2003.
José Antonio López Rodríguez
Presidente do Xurado Provincial de Clasificación
de Montes Veciñais en Man Común de Pontevedra
