Dentro dos programas de actividades que a Academia Galega de Seguridade ten previsto realizar no ano 2003, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a realización dun curso de especialización en autocad para elaboración de atestados e dispositivos de tráfico, que deberá desenvolverse conforme as seguintes bases:

* Obxectivos.

1. Perfeccionarse nos coñecementos de expresión gráfica.

2. Especializarse no manexo de paquetes de deseño para a confección de atestados ou informes.

3. Adoptar técnicas automatizadas para a representación gráfica nos informes.

* Destinatarios.

O curso vai dirixido ós membros dos corpos das policías locais de Galicia e membros da Unidade do CNP adscrita á Comunidade Autónoma de Galicia, preferentemente ó persoal que xa participou no primeiro destes cursos realizado na AGS. No caso de quedaren prazas vacantes, abriríase ó resto dos membros de ámbolos dous corpos, sempre que superasen unha proba previa sobre coñecementos informáticos mínimos para o acceso a este curso.

* Inscrición.

A inscrición dos participantes será totalmente gratuíta.

* Prazas.

O número de prazas que se ofertan neste curso é de 30.

* Solicitudes.

1. O persoal que desexe participar neste curso deberá presentar, cuberta a máquina ou con letra moi clara, a instancia que figura no anexo.

2. O prazo para a presentación de instancias rematará o día 22 de abril, ás 14 horas.

3. As instancias deberán vir asinadas polo xefe do cadro de persoal, ou polo concelleiro de Tráfico e seladas; será isto requisito indispensable para ser admitido nos cursos; o incumprimento deste requisito levará consigo a non admisión ó devandito curso.

4. As instancias deberán enviarse á sede da Academia Galega de Seguridade, avenida da Cultura, s/n, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

* Datas e horario.

O curso terá unha duración total de 60 horas, dividido en dúas partes:

1ª parte: que será presencial, cunha duración de 40 horas, e desenvolverase durante os días 25 de abril, 2, 9, 16, 20, 23 e 27 de maio; cun horario de 9 a 14 horas os venres e os martes (días 20 e 27 de maio) de 9 a 14 horas e de 16 a 19 horas.

2ª parte: a distancia, consistente en 20 horas, as cales serán tutorizadas polo profesor ó longo do curso e consistirán na realización dun traballo de acordo co exposto neste.

* Relación de admitidos.

A relación de admitidos publicarase o día 23 de abril, no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.

* Lugar.

O curso desenvolverase na aula de informática da Academia Galega de Seguridade, avenida da Cultura, s/n, A Estrada.

* Certificado de asistencia.

Ó remate do curso entregaráselle un certificado de asistencia a aquelas persoas que acrediten a súa participación continuada a este.

* Modificacións.

A Academia Galega de Seguridade poderá modifica-lo desenvolvemento normal do curso para adaptalo ás necesidades da Administración e ás continxencias que poidan xurdir.

A Estrada, 25 de marzo de 2003.

Juan José Fariñas-Ferro Rodríguez

Director xeral da Academia Galega de Seguridade