En cumprimento do disposto no artigo 74 da Lei 5/1998, do 18 de decembro, de cooperativas de Galicia e no artigo 53 do Regulamento do rexistro de cooperativas, faise público que esta dirección xeral resolveu inscribir no Rexistro Central de Cooperativas a modificación de estatutos sociais da entidade Cooperativa Agraria de Meirás, Sociedade Cooperativa Galega, acordada na asemblea xeral celebrada o 24 de novembro de 2002, constando como nova denominación: Cooperativa de Meirás de Consumidores e Usuarios, Sociedade Cooperativa Galega, clasificándose como cooperativa de consumidores e usuarios e tendo como novo obxecto social procurar, nas mellores condicións de calidade, información e prezo, bens e servicios, para o consumo ou uso dos socios e dos familiares que con eles convivan, en particular:

-Subministración de artigos de consumo, uso, vestido, mobiliario e demais elementos propios da economía doméstica.

-Servicios diversos para a realización das actividades domésticas.

-Bens e servicios e actividades necesarias para a vida docente, desenvolvemento cultural e cultivo do tempo libre dos socios, como libros, material didáctico, instalacións deportivas.

-Concertos de intermediación económicos con entidades financeiras, compañías de seguros, empresas de distribución que contribúan á provisión de bens de diversa natureza propios de todos eles da economía doméstica.

Igualmente constitúen o obxecto desta sociedade a defensa, formación, información e promoción dos dereitos dos consumidores e usuarios.

Calquera outro fin lícito que teñan ou poida ter no futuro, relación directa ou indirecta co cumprimento do obxecto social.

Santiago de Compostela, 30 de xaneiro de 2003.

Pilar Cancela Rodríguez

Directora xeral de Relacións Laborais