Examinado o escrito presentado por Araceli Iglesias Pérez, en representación da titularidade do cen

tro privado concertado Santamariña da Coruña, en solicitude de cesamento de actividades do dito centro.

Resultando que por Orde do 18 de decembro de 2002 (DOG do 30 de decembro) se modifica o concerto educativo co centro privado Santamariña da Coruña, reducíndolle 1 unidade do ciclo formativo de grao medio de comercio, 1 unidade do programa de garantía social de servicios auxiliares de oficina e 1 unidade do programa de garantía social de dependente de comercio, con efectos económico-administrativos do 31 de decembro de 2002; que esta actuación foi motivada por non contar cun número mínimo de alumnos escolarizados nas mencionadas unidades e logo do preceptivo trámite de audiencia ó interesado; e que en aplicación do calendario escolar vixente para o curso 2002-2003 o citado centro, o día 8 de xaneiro de 2003, non reiniciou a súa actividade lectiva e, con data do 9 de xaneiro de 2003 solicita o cesamento de actividades do ciclo formativo de grao medio de xestión administrativa para o que tiña concerto educativo en vigor.

Vistos a Lei orgánica 8/1985, do 3 de xullo, reguladora do dereito á educación (BOE do 4 de xullo); Lei orgánica 9/1995, do 20 de novembro, da participación, a avaliación e o goberno dos centros docentes (BOE do 21 de novembro); Real decreto 2377/1985, do 18 de decembro, polo que se aproba o Regulamento de normas básicas sobre concertos educativos (BOE do 27 de decembro); Decreto 133/1995, do 10 de maio, sobre autorización de centros docentes privados para impartir ensinanzas de réxime xeral non universitarias (DOG do 22 de maio), e a Orde do 20 de setembro de 1995, pola que se desenvolve o dito decreto (DOG do 15 de decembro).

Considerando que ante a decisión unilateral do centro privado Santamariña de pecha-las súas instalacións se procedeu á escolarización dos alumnos afectados en centros sostidos con fondos públicos na cidade da Coruña.

Considerando que a Comisión de Conciliación, prevista na disposición derradeira primeira.8 da antedita Lei orgánica 9/1995, non se chegou a celebrar por non comparecer representación do devandito centro privado.

Polo anteriormente exposto, esta consellería

DISPÓN:

Primeiro.-Autoriza-lo cesamento de actividades do centro privado Santamariña de acordo coa solicitude instada voluntariamente pola súa titularidade.

Segundo.-A extinción da autorización acordada no punto anterior é, así mesmo, causa de extinción do concerto educativo, e os seus efectos terán lugar a partir do momento do cesamento efectivo da citada actividade.

Terceiro.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 28 de febreiro de 2003.

Celso Currás Fernández

Conselleiro de Educación e Ordenación

Universitaria

CONSELLERÍA DE CULTURA, COMUNICACIÓN SOCIAL

E TURISMO