Dentro das actividades programadas para o ano 2003 en colaboración coa Deputación Provincial de Ourense, en virtude do convenio de formación asinado entre a Consellería de Xustiza, Interior e Administración Local e a Deputación Provincial de Ourense, anúnciase a realización dun curso de actualización na Lei sobre axuizamento rápido para algúns delictos e faltas, que deberá desenvolverse conforme as seguintes bases:
Obxectivos.
O curso ten por obxectivo a preparación e actualización dos membros dos corpos de Policía Local da provincia de Ourense, en relación coa reforma parcial da LAC provocada pola Lei 38/2002, e tamén
pola Lei orgánica 8/2002, ámbalas dúas do 24 de outubro, sobre o procedemento para o axuizamento rápido e inmediato de determinados delictos e faltas e de modificación do procedemento abreviado.
Publicación.
Esta actividade formativa, e tamén todas aquelas que se desenvolvan en colaboración coa Deputación Provincial de Ourense, serán obxecto de publicación no Diario Oficial de Galicia e no BOP de Ourense.
Destinatarios.
O curso vai dirixido ós membros dos corpos de Policía Local dos concellos da provincia de Ourense.
Inscrición.
A inscrición dos participantes será totalmente gratuíta.
Prazas.
30 prazas.
Solicitudes.
1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo.
2. O prazo para a presentación de instancias rematará o día 1 de abril de 2003, ás 14 horas.
3. As instancias deberán enviarse á Deputación Provincial de Ourense: Departamento de Formación Continua; rúa Progreso, nº 30, 32003 Ourense e nº de fax 988 38 52 15; ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Datas.
O curso realizarase do 7 ó 11 de abril de 2003.
O horario será das 17 ás 21 horas.
Contido.
O curso desenvolverase en sesións de tarde, de luns a venres, e nel trataranse os seguintes módulos:
-Os procedementos de axuizamento criminal.
-A instrucción criminal.
-Funcións procesuais da Policía Xudicial.
-O procedemento para o axuizamento rápido e inmediato de determinados delictos e faltas.
-Organización e cometidos da Policía Local.
Relación de admitidos.
A relación de admitidos farase pública o día 3 de abril a partir das 14 horas, tanto por parte da Deputación Provincial de Ourense como por parte da Academia Galega de Seguridade. Os admitidos poden confirma-la súa asistencia chamando ós teléfonos 986 59 00 21 (AGS) ou 988 38 51 42 (Dpto. de Formación Continua da Deputación Provincial de Ourense).
Lugar.
O curso desenvolverase nas aulas do centro cultural da Deputación Provincial de Ourense sito na rúa Progreso nº 30.
Certificado de asistencia.
Ó remate do curso entregaráselles un certificado de asistencia a aquelas persoas que acrediten a súa participación continuada.
Modificacións.
Tanto a Academia Galega de Seguridade como a Deputación Provincial de Ourense, se é o caso, poderán modifica-lo desenvolvemento do curso para adaptalo ás necesidades da Administración e ás continxencias que poidan xurdir.
A Estrada, 26 de febreiro de 2003.
Juan José Fariñas-Ferro Rodríguez
Director xeral da Academia Galega de Seguridade