Dentro do Plan de actividades da Escola Galega de Administración Pública para o 2003 e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócanse unhas Xornadas sobre a reforma do desemprego, convocatoria que se desenvolverá conforme as seguintes bases:
1. Obxectivos.
-Coñecemento e debate das principais orientacións de reforma da última modificación da protección por desemprego.
-Análise das súas incidencias no contrato de traballo: salarios de tramitación, pagamento das vacacións, encadeamento de contratos temporais.
-Estudio das orientacións das políticas de emprego en relación coa cobertura do desemprego.
-Descrición dos colectivos máis afectados pola reforma: eventuais agrarios, fixos periódicos, traballadores migrantes e beneficiarios de subsidios asistenciais.
-Interpretación do contido dos conceptos de oferta de emprego adecuada e de compromiso de actividade.
2. Contido.
Trataranse estes temas:
-Principais liñas de reforma da protección por desemprego.-As novidades no ámbito da prestación contributiva.
-As novidades no nivel asistencial da protección por desemprego.
-O concepto de colocación adecuada e o compromiso de actividade.
-Os programas de emprego dos perceptores de prestacións. Pagamento único. Mobilidade xeográfica. Formación profesional. Compatibilidade co traballo por conta allea.
-A nova normativa sobre salarios de tramitación.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos da Delegación Provincial da Consellería da Presidencia, Relacións Institucionais e Administración Pública na Coruña (praza de Pontevedra, s/n, da citada cidade), os días 24 e 25 de febreiro de 2003.
5. Inscrición.
-Prazo: remata o xoves, día 20 de febreiro de 2003.
-Tramitación de solicitudes: as solicitudes irán dirixidas ó director da Escola Galega de Administración Pública, Polígono das Fontiñas, Rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemen
to administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 21 de febreiro, de 8.30 a 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como o de cancelalas se o escaso número de solicitudes non xustificase a súa realización.
7. Certificación de asistencia.
Entregaráselles ó remate destas xornadas a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 27 de xaneiro de 2003.
Domingo Bello Janeiro
Director da Escola Galega de Administración
Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA