A Lei 6/2002, do 27 de decembro, de orzamentos xerais da Comunidade Autónoma de Galicia para o ano 2003 establece no seu artigo 43 unha modificación do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, na súa regulación do prazo mínimo para a presentación de solicitudes de axudas e subvencións públicas, ampliándoo de 20 días hábiles a 40 días hábiles.
Así mesmo o citado artigo establece que as ordes de axudas e subvencións manteñan un escrupuloso respecto ó disposto na Lei 30/1992, de réxime xurídico das administracións públicas e procedemento administrativo común, no que se refire á presentación de documentos que constan en poder da Xunta de Galicia.
Como queira que a orde que se modifica foi publicada con anterioridade á entrada en vigor da Lei 6/2002, do 27 de decembro, de orzamentos xerais da Comunidade Autónoma de Galicia para o ano 2003, ó terse tramitado en réxime anticipado, require a súa adaptación ós anteriores mandatos legais.
Para cumprir este mandato e unha vez obtidos os preceptivos informes,
DISPOÑO:
Artigo 1º
Modifícase o epígrafe 1º do artigo 5 correspondente ó prazo de presentación de solicitudes, quedando redactado como segue:
O prazo para a presentación de solicitudes será o comprendido entre o día 29 de novembro de 2002 e o 7 de febreiro de 2003.
Artigo 2º
Modifícase o epígrafe 3º do artigo 5 correspondente ás solicitudes e documentación, ó que se lle engade o seguinte epígrafe:
Non será necesaria a presentación de todos aqueles documentos que consten en poder da Xunta de Galicia, debéndose indica-lo solicitante, co obxecto da súa rápida localización, a unidade administrativa en que se atopan.
Santiago de Compostela, 16 de xaneiro de 2003.
Juan Rodríguez Yuste
Conselleiro de Industria e Comercio