O Xulgado de Primeira Instancia e Instrucción número seis de Ferrol, por auto dictado o 14 de novembro de 2002, declarou a Comunidade Autónoma de Galicia herdeira legal dos bens de Emilia de los Reyes García Gómez, veciña de Ferrol.
A Comunidade Autónoma galega tomou posesión dos bens hereditarios conforme o disposto no artigo 8.1º do Decreto 94/1999, do 25 de marzo, que regula a sucesión intestada en favor da Comunidade Autónoma de Galicia. Segundo o artigo 153.2º da Lei 4/1995, do 24 de maio, de dereito civil de Galicia, os ditos bens serán destinados a establecementos de asistencia social ou a institucións de cultura, preferentemente radicados na última residencia habitual da causante e, en todo caso, en territorio galego.
En consecuencia faise público o seguinte anuncio:
No exercicio das competencias atribuídas á Secretaría Xeral e do Patrimonio nos artigos 7 da Lei 3/1985, do 12 de abril, de patrimonio da Comunidade Autónoma galega, e 4.1º b) do Decreto 312/2000, do 28 de decembro, pola que se establece a estructura orgánica da Consellería de Economía e Facenda, de acordo co disposto no artigo 10 do citado Decreto 94/1999, ábrese o prazo dun mes contado a partir do día seguinte ó da publicación deste anuncio, para que os posibles beneficiarios dos bens da sucesión intestada de Emilia de los Reyes García Gómez, veciña de Ferrol, falecida o 7 de maio de 2001, formulen alegacións perante a Consellería de Economía e Facenda.
O expediente poderá examinarse na Subdirección Xeral do Patrimonio, con enderezo en Área Central,
rúa Varsovia nº 4 C, 1ª planta, oficina 7N de luns a venres en horario das 9 ás 14 horas.
Santiago de Compostela, 2 de decembro de 2002.
Emilio Álvarez Rey
Secretario xeral e do Patrimonio da Consellería
de Economía e Facenda
CONSELLERÍA DE POLÍTICA TERRITORIAL, OBRAS PÚBLICAS
E VIVENDA