Descargar PDF Galego | Castellano

DOG - Xunta de Galicia -

Diario Oficial de Galicia
DOG Núm. 237 Martes, 10 de decembro de 2002 Páx. 17.004

VI. ANUNCIOS

DA ADMINISTRACIÓN AUTONÓMICA

CONSELLERÍA DE MEDIO AMBIENTE

RESOLUCIÓN do 12 de xuño de 2002, do Xurado Provincial de Clasificación de Montes Veciñais en Man Común da Coruña, pola que se resolve o expediente número 371 que afecta ó monte Leguiña, do lugar de Mazaricos de Arriba, parroquia de Mazaricos, concello de Mazaricos.

Para os efectos previstos no artigo 28 do regulamento para a aplicación da Lei 13/1989, de montes veciñais en man común, e de conformidade co disposto no artigo 60.1º da Lei 30/1992, de réxime xurídico das administracións públicas e do procedemento administrativo común, faise público que o Xurado Provincial de Clasificación de Montes Veciñais en Man Común da Coruña, en sesión que tivo lugar o 29 de maio de 2002, adoptou o seguinte acordo:

Reunido o 29 de maio de 2002 o Xurado Provincial de Clasificación de Montes Veciñais en Man Común da Coruña, baixo a presidencia do delegado provincial da Consellería de Medio Ambiente, Higinio J. Sánchez-Rodilla Fuentes, coa asistencia dos vocais, Josefa Fernández Fernández, xefa do Servicio de Montes e I.F., Alfonso Vázquez Castro-Garma, letrado do Gabinete Xurídico Territorial da Xunta de Galicia, Juan Ramón Beneyto Bellas, representante do Colexio de Avogados da Coruña, José Manuel Caramés Franco, representante das comunidades veciñais de Montes en Man Común, e da secretaria Ana María Díaz López, xefa do Servicio Xurídico da Delegación de Medio Ambiente da Coruña, para estudiar e resolve-lo

Expediente: 371.

Monte: Leguiña.

Comunidade: Lugar de Mazaricos de Arriba.

Parroquia: Mazaricos.

Concello: Mazaricos.

Antecedentes de feito.

Primeiro.-Os veciños do lugar de Mazaricos de Arriba, parroquia de Mazaricos, concello de Mazaricos, solicitaron deste xurado, con data do 19-9-2000, a declaración como veciñal do expresado lugar, do monte arriba citado e que ten as seguintes características:

Superficie: 12,80 ha.

Lindeiros:

É parte do monte Aro, nº 103-B do C.U.P.

Norte: con máis monte Aro, seguindo balado de terra que vai desde o punto denominado Riba do Camiño de Lago, situado a 168 m en dirección norte do piquete 73 do deslindamento do monte Aro ata o punto denominado Campo Redondo, situado entre os piquetes 19 e 20. Leste: monte Sta. Mariña, desde o punto Campo Redondo, entre os piquetes 19 e 20, ata o 23 seguindo a orde de piquetes. Propiedades particulares de veciños de Atán e Mazaricos de Arriba, desde o piquete 23 ó 27, no cruzamento de Cabalo Morto, seguindo a orde de piquetes. Sur: monte veciñal de Serráns, seguindo unha liña recta duns 190 m que vai do piquete 27, no cruzamento de Cabalo Morto, ata o 66. Oeste: propiedades particulares de veciños de Mazaricos de Arriba, do piquete 66 ó 73 seguindo a orde de piquetes, e deste último segue 168 m na liña do deslindamento ata chegar ó punto Riba do Camiño de Lago.

Segundo.-Á vista de tal solicitude, o xurado, na súa reunión do 10-5-2001, acordou inicia-lo oportuno expediente, nomeándose como instructora del a Ana María Díaz López, quen aceptou expresamente o dito cargo. Procedeuse correspondente tramitación, librándose mandamento para a anotación preventiva no Rexistro da Propiedade de Muros, oídas tódalas persoas, organismos e corporacións interesadas, expedíndose mandamentos para tal fin dirixidos ó alcalde-presidente do Concello de Mazaricos, ó xefe do Servicio de Montes e I.F. e publicándose edictos no DOG (nº 175, do 10-9-2001), taboleiro de anuncios do concello e lugares de costume.

Terceiro.-Os veciños de Mazaricos de Arriba fundamentan a súa petición ante o Xurado Provincial de Clasificación de Montes Veciñais en Man Común en que viñan aproveitando de forma consuetudinaria en réxime de comunidade sen asignación de cotas, segundo os usos e costumes, o monte correspondente ó dito lugar. Achegan copia de documentos onde hai referencias da existencia do monte veciñal.

Cuarto.-Publicados os edictos, e transcorrido o prazo para posibles reclamacións, non houbo presentada alegación ningunha contra o presente expediente.

Quinto.-Na tramitación destas actuacións cumpríronse as formalidades legais e regulamentarias, esixidas principalmente pola Lei 13/1989, do 10 de outubro, de montes veciñais en man común, e

o seu Regulamento de aplicación aprobado polo Decreto 260/1992, do 4 de setembro, ámbolos dous da Comunidade Autónoma de Galicia, Lei de procedemento administrativo e demais disposicións aplicables ó caso.

Fundamentos de dereito.

Primeiro.-O Xurado Provincial de Clasificación de Montes Veciñais en Man Común da Coruña ten xurisdicción e competencia para coñecer deste expediente en virtude do disposto nos artigos 9 e 10 da Lei 13/1989, do 10 de outubro, de montes veciñais en man común.

Segundo.-De conformidade co contido do artigo 11 da citada lei e 19 do regulamento, aprobado polo Decreto 260/1992, do 4 de setembro, os veciños do lugar de Mazaricos de Arriba son parte lexítima para solicita-la iniciación do presente expediente de cualificación.

Terceiro.-Para a súa cualificación como veciñal en man común, o monte debe reuni-las seguintes características: 1) Pertenza a agrupacións de veciños na súa calidade de grupos sociais, non como entidades administrativas; 2) Se aproveite consuetudinariamente en réxime de comunidade, sen asignación de cotas polos membros de cada agrupación na súa condición de veciños comuneiros; 3) Que os veciños comuneiros residan habitualmente con casa aberta dentro da área xeográfica sobre a que se asenta o grupo social que tradicionalmente aproveitou o monte (artigos 1, 2 e 3 da Lei 13/1989 e 1, 2 e 3 do Regulamento do 4 de setembro de 1992).

Cuarto.-Das actuacións que constan no expediente, e en especial da comprobación do expresado no punto anterior, que vén avalado polo informe achegado polo Servicio de Montes e I.F. desta delegación, onde hai referencia ós aproveitamentos realizados pola comunidade solicitante, dedúcese que no presente caso nos encontramos cun monte pertencente á Comunidade Veciñal do lugar de Mazaricos de Arriba, no que se cumpren os aludidos requisitos.

Por iso, este xurado, á vista dos antecedentes e fundamentos de dereito expostos, por proposta do instructor,

Acorda cualificar como veciñal en man común o monte Leguiña, de pertenza do lugar de Mazaricos de Arriba, parroquia de Mazaricos, concello de Mazaricos. Así mesmo, acórdase excluí-lo declarado do Inventario de Bens do Concello e do Catálogo dos de Utilidade Pública, se neles estivera inscrito, incluíndoo no Rexistro de Montes Veciñais en Man Común que figura na Delegación de Medio Ambiente da Coruña.

Contra esta resolución poderase interpoñer recurso de reposición con carácter potestativo ante o Xurado Provincial de Clasificación de Montes Veciñais en Man Común da Coruña no prazo dun mes ou recurso contencioso-administrativo ante o Tribunal Superior de Xustiza de Galicia no prazo de dous meses, con

tados desde o día seguinte ó da súa publicación no Diario Oficial de Galicia, segundo o disposto na Lei 4/1999, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común.

A Coruña, 12 de xuño de 2002.

Ana María Díaz López

Secretaria do Xurado Provincial de Clasificación de Montes Veciñais en Man Común da Coruña

Visto e prace

Higinio J. Sánchez-Rodilla Fuentes

Presidente do Xurado Provincial de Clasificación de Montes Veciñais en Man Común da Coruña