O Concello de Cervo, en sesión celebrada o día nove de maio de dous mil dous, aprobou o proxecto do paseo peonil da ría de Leiro á praia de Limosa, e na mesma sesión, acordou solicitar da Xunta de Galicia a declaración de urxente ocupación dos bens
e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
Por parte do concello foi remitida a documentación complementaria para a correcta tramitación do expediente con data de entrada no rexistro xeral da Consellería de Xustiza, Interior e Relacións Laborais o día dezaoito de setembro de dous mil dous.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable. Este informe tivo entrada no rexistro xeral da Consellería de Xustiza, Interior e Relacións Laborais o día vinte de agosto de dous mil dous.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque segundo sinala o Concello de Cervo, a realización da obra é de vital importancia, ó estar situada no núcleo turístico de San Cibrao, moi destacado na Mariña de Lugo, representando a actividade turística unha boa parte dos recursos desta vila; ademais nesta zona están instalados complexos industriais de granxas mariñas, estando previstos a construcción doutros, polo que se fai necesario recuperar novas zonas de esparexemento para o uso e desfrute dos cidadáns. Por outra banda o concello pretende museizar e recupera-las súas riquezas para fomenta-lo desenvolvemento municipal, a través de actuacións na área ambiental e rehabilitación de antigas fábricas de salgadura existentes nesa zona, polo que o proxecto ecomuseolóxico e museográfico se vería seriamente comprometido no caso de non executarse o proxecto do paseo peonil da ría de Leiro
á praia de Limosa.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día vinteseis de setembro de dous mil dous,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Cervo, para os efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto do paseo peonil da ría de Leiro á praia de Limosa.
Santiago de Compostela, vinteseis de setembro de dous mil dous.
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Relacións Laborais
