A Orde do 10 de maio de 2002 (DOG nº 98, do 23 de maio), regula a concesión de subvencións ás

entidades locais da Comunidade Autónoma de Galicia para o mantemento de puntos de atención continuada e zonas especiais de urxencias que funcionen en centros de saúde de titularidade municipal.

O artigo 7 da antedita orde regula a xustificación e o pagamento destas subvencións, determinando un prazo para a xustificación do gasto realizado, que está previsto que remate o vindeiro día 30 de novembro.

O mesmo artigo citado establece que tal prazo se poderá modificar por causas debidamente xustificadas, mediante resolución do director xeral da División de Recursos Económicos do Servicio Galego de Saúde.

A demora involuntaria na concesión das subvencións afecta, neste caso, o prazo de xustificación previsto na orde citada inicialmente, quedando este reducido a 23 días. Dado que este prazo se considera moi axustado tendo en conta a transcendencia da documentación que se vai presentar, e co obxecto de mellor garanti-lo dereito dos beneficiarios, facendo uso da facultade de modificación recoñecida no mesmo precepto, esta división

RESOLVE:

Amplia-lo prazo de xustificación do gasto realizado previsto no artigo 7 da Orde do 10 de maio de 2002 ata o día 31 de decembro de 2002.

Santiago de Compostela, 13 de novembro de 2002.

Antonio Fernández-Campa García-Bernardo

Director xeral da División de Recursos Económicos