O Consello da Xunta de Galicia acordou na súa reunión do 3 de outubro de 2002, declara-lo proxecto liña de alta tensión 132 kV subestación Boimente-subestación Buio/tramo subestación Boimente/apoyo nº 13, promovido pola empresa Electra de Viesgo I, S.A., como de incidencia supramunicipal, para os efectos previstos na Lei 10/1995, de ordenación do territorio de Galicia.

Polo tanto, en cumprimento do disposto no artigo 13.2º do Decreto 80/2000, do 23 de marzo polo que se regulan os plans e proxectos sectoriais de incidencia supramunicipal, segundo o cal os plans ou proxectos que o Consello da Xunta declare como de incidencia supramunicipal se someterán por un prazo mínimo dun mes ós trámites de información pública, mediante o correspondente anuncio no Diario Oficial de Galicia e nun dos periódicos de maior audiencia na Comunidade Autónoma e de audiencia ás entidades locais sobre as que incida o plan ou proxecto

RESOLVE:

Someter a información pública o proxecto liña de alta tensión 132 kV subestación Boimente-subestación Buio/tramo subestación Boimente/apoio nº 13, declarado como de incidencia supramunicipal por acordo do Consello da Xunta de Galicia de data 3 de outubro de 2002, por un prazo dun mes contado a partir da publicación desta resolución no Diario Oficial de Galicia.

Os interesados disporán do citado prazo dun mes para examina-lo proxecto sectorial na Dirección Xeral de Industria, Enerxía e Minas e na Delegación Provincial de Lugo, e presentar ante esta dirección xeral as alegacións que consideren pertinentes.

Lugo, 7 de outubro de 2002.

Ramón Ordás Badía

Director xeral de Industria, Enerxía e Minas