Conforme establece o artigo 34 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio), correspóndelle a esta dirección xeral fixa-las normas que rexerán o sorteo de permisos de pesca en coutos para pescadores.
As normas do sorteo de permisos de pesca en couto para pescadores para a tempada 2003 serán as seguintes:
-As solicitudes presentaranse antes das 14 horas do 15 de novembro no Rexistro do Servicio Provincial de Conservación da Natureza que corresponda, ou mediante o procedemento descrito no artigo 38 da Lei 30/1992, do 26 de novembro.
-Os modelos de solicitude estarán á disposición dos interesados nos servicios provinciais de Conservación da Natureza ou nesta dirección xeral.
-O sorteo terá lugar nos servicios provinciais o día 25 de novembro.
-A hora do sorteo, o seu procedemento e o de selección de permisos e outras normas complementarias serán establecidos por cada servicio provincial e expostos no taboleiro de anuncios de cada delegación provincial da Consellería de Medio Ambiente.
-A normativa de funcionamiento dos coutos será a que estableza a orde anual que regula os períodos hábiles de pesca e normas relacionadas con ela nas augas continentais da Comunidade Autónoma de Galicia durante a tempada de 2003. Os permisos seran outorgados con esta condición e sen que os posibles cambios na normativa poidan dar lugar a cambios de permisos, agás no caso concreto de que se prohíba a práctica da pesca na data ou no couto obtido.
Santiago de Compostela, 16 de outubro de 2002.
Francisco García-Bobadilla Prosper
Director xeral de Conservación da Natureza
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA