O Consello de Administración de Vigo Zoo en sesión do 30 de xullo de 2002, adoptou o seguinte acordo:

1. Aproba-las bases xerais para contratación en réxime laboral fixo dun auxiliar administrativo para cubrir un posto da mesma denominación vacante no cadro de persoal de Vigo-Zoo. As bases xerais serán as publicadas pola Corporación Municipal no BOP do 10 de xuño e DOG do 28 de xuño de 2002, para o persoal laboral coas seguintes modificacións:

a) Con carácter xeral calquera referencia ó concello entenderase efectuada ó Organismo Autónomo Municipal Vigo-Zoo e se se fan o alcalde-presidente entenderase ó seu presidente. Así mesmo o taboleiro de edictos do concello substitúese polo de anunicos de Vigo-Zoo, e cando se alude á Tesourería Muni

cipal substitúese pola Tesourería do Organismo Autónomo.

b) Na base I, Obxecto da convocatoria, substituirase o seu contido polo de contratación en réxime laboral fixo dun auxiliar administrativo.

c) Na base VII, tribunal cualificador, substituirase a referencia ó presidente e secretario da corporación pola de presidente e secretario do organismo autónomo. Así mesmo os representantes da corporación polos representantes do consello de administración; e os do comité de empresa polos do persoal designados polo seu delegado.

2. En canto ás bases específicas serán as seguintes:

I. Número de prazas: 1.

II. Denominación: auxiliar-administrativo.

III. Características:

Equiparadas ó grupo D de titulación. Estará dotada coas retribucións básicas que legalmente corresponden ó grupo D e as complementarias propias do posto de traballo ó que resulte adscrita a praza que se convoca.

Figurará incluída no réxime de dedicación exclusiva.

IV. Sistema de selección:

Establécese o de oposición libre de conformidade co previsto nestas bases específicas e o establecido nas bases xerais das convocatorias derivadas da oferta de emprego público correspondente ó ano 2001.

V. Condicións dos aspirantes:

Ademáis das que figuran na base IV das xerais, as/os aspirantes deberán estar en posesión do título de graduado escolar, FP1 ou equivalente.

VI. Exercicios da oposición:

Primeiro exercicio.-De carácter obrigatorio e eliminatorio para tódolos/as aspirantes.

Consistirá nunha copia a máquina durante 10 minutos dun texto que facilitará o tribunal, a unha velocidade mínima e excluínte de 200 pulsacións por minuto. Se o/a aspirante utilizase máquina eléctrica -está prohibida a electrónica- a velocidade mínima e excluínte será de 230 pulsacións por minuto.

Cualificarase a velocidade desenvolvida, a limpeza e a exactitude do copiado e a corrección que presente o escrito, de acordo cun baremo obxectivo que estableza o tribunal antes de iniciarse o exercicio, que deberá comunicarse ós aspirantes no momento de comeza-la proba e incluírse na correspondente acta.

Segundo exercicio.-De carácter igualmente obrigatorio e eliminatorio.

Consistirá en contestar por escrito a tres temas extraídos ó chou entre os que figuran como anexo ás presentes bases nun prazo máximo de 90 minutos.

Terceiro exercicio.-Así mesmo obrigatorio e eliminatorio.

Consistirá na elaboración dun suposto práctico nun ordenador persoal mediante un paquete integrado baixo contorno windows no tempo que estableza o tribunal.

Cuarto exercicio.-De carácter obrigatorio e non eliminatorio.

Consistirá na práctica da proba de coñecemento do idioma galego prevista na base X das xerais, coa particularidade de que os tres primeiros se cualificarán de 0 a 10 puntos.

Quinto exercicio.-De carácter voluntario, aínda que servirá para efectos de cómputo de puntuación final para determina-los aspirantes aprobados.

Consistirá nunha proba de coñecemento de idiomas oficiais da Unión Europea -excluído o castelán- e das comunidades autónomas con lingua vernácula -excluído o galego-, que se realizará nas condicións e forma prevista na base X das xerais.

A cualificación de cada exercicio e a final farase de conformidade co previsto na base X das xerais, coa particularidade de que os catro primeiros se cualificarán de 0 a 10 puntos, quedando eliminado/a o/a aspirante que non obteña un mínimo de 5 puntos en cada un de eles.

ANEXO

Temario

(Exclúese o común para prazas do grupo D, que figura como anexo ás bases xerais)

Tema 1.-A Constitución española de 1978. Principios xerais. Dereitos e deberes fundamentais dos españois. A Coroa.

Tema 2.-Os poderes do Estado: a división de poderes.

Tema 3.-A Unión Europea. A acta única europea. As liberdades básicas do sistema comunitario: libre circulación de persoas, mercadorías, servicios e capitais. Breve referencia ás institucións da Unión Europea.

Tema 4.-O Estatuto de autonomía de Galicia: principios xerais e estructura.

Tema 5.-A administración pública no ordenamento español. Administración do Estado. Administracións autonómicas. Administración local. Administración institucional e corporativa.

Tema 6.-Principios de actuación da administración pública: eficacia, xerarquía, descentralización, desconcentración e coordinación, sometemento da administración á lei e ó dereito. Fontes do dereito público.

Tema 7.-O acto administrativo. Principios xerais do procedemento administrativo. Fases do procedemento administrativo xeral.

Tema 8.-Os servicios públicos locais: especial consideración do organismo autónomo municipal.

Tema 9.-Réxime local español. Principios constitucionais e regulación xurídica.

Tema 10.-O municipio. O termo municipal. A poboación. O empadroamento.

Tema 11.-Organización municipal. Competencias.

Tema 12.-Ordenanzas e regulamentos das entidades locais. Clases. Procedemento de elaboración e aprobación.

Tema 13.-Regulación das condicións de traballo do persoal de Vigo-Zoo, segundo do convenio colectivo do persoal laboral do Concello de Vigo, aplicable a Vigo-Zoo.

Tema 14.-Procedemento administrativo local. O rexistro de entrada e saída de documentos. Requisitos da presentación de documentos. Comunicacións e notificacións.

Tema 15.-Funcionamento dos órganos colexiados locais. Convocatoria e orde do día. Actas e certificacións dos acordos.

Tema 16.-A execución do orzamento de gastos: fases que comprende órganos competentes en cada unha delas.

Tema 17.-Partes dun ordenador. Memoria e os seus tipos. Periféricos de entrada, saída e almacenamento. Software básico e de aplicación. Os principais sistemas operativos e a súa función.

Tema 18.-Tratamento de textos: principais operacións nun tratamento de texto, finalidade, principais programas existentes. Bases de datos: concepto e finalidade.

Tema 19.-Aspectos básicos da organización de arquivos de organismos oficiais e as súas oficinas.

Tema 20.-Competencias do consello de administración e o seu presidente segundo os estatutos do Organismo Autónomo Municipal Vigo-Zoo. (BOP do 11 de xullo de 1984).

Vigo, 16 de setembro de 2002.

Amador Fernández Fernández

Presidente de Vigo-Zoo