Visto o texto do convenio colectivo para a empresa Setex Aparki, S.A. (O.R.A.) (código 2700652), da provincia de Lugo, asinado o día 1 de abril de 2002, pola representación da citada empresa e a dos seus traballadores, e de conformidade co disposto no arti
go 90, números 2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, e no Real decreto 1040/1981, do 22 de maio, sobre rexistro e depósito de convenios colectivos de traballo.
Esta delegación provincial
ACORDA:
Primeiro.-Ordena-la inscrición do citado convenio colectivo no rexistro de convenios desta delegación, así como o seu depósito.
Segundo.-Remiti-lo texto do mentado convenio á Dirección Xeral de Relacións Laborais da Xunta de Galicia.
Terceiro.-Dispoñe-la súa publicación no Diario Oficial de Galicia.
Lugo, 16 de abril de 2002.
Manuel Teijeiro Álvarez
Delegado provincial de Lugo
Convenio colectivo para os traballadores da
empresa Setex Aparki, S.A. de Lugo
Ano 2002, 2003 e 2004
Capítulo I
Disposicións xerais
Artigo 1º.-Ámbito funcional.
Este convenio regula as relacións laborais entre a empresa Setex Aparki, S.A. e o seu persoal.
Artigo 2º.-Ámbito xeográfico.
O ámbito xeográfico deste convenio circunscríbese á cidade de Lugo.
Artigo 3º.-Duración.
O convenio entrará en vigor o día 1 de xaneiro de 2002 con independencia da súa publicación no BOP e a súa vixencia estenderase ata o 31 de decembro de 2004. Os seus efectos económicos serán desde o 1 de xaneiro de 2002.
Artigo 4º.-Denuncia.
Calquera das partes asinantes poderá denuncia-la expiración da vixencia do citado convenio, e deberá facelo cun mínimo de tres meses antes do respectivo vencemento.
A denuncia efectuarase mediante comunicación fidedigna á outra parte e á Dirección Provincial de Traballo.
De non ser denunciado en tempo e forma por ningunha das partes, prorrogarase automaticamente por anualidades naturais, elevando os conceptos económicos na mesma proporción na que o faga o IPC previsto para ese ano máis un punto.
Denunciado o convenio, se as negociacións se estendesen por un período superior á súa vixencia, entenderase prorrogado este ata a entrada en vigor do novo convenio.
Artigo 5º.-Vinculación á totalidade.
No suposto de que a xurisdicción laboral declarase contrario ás disposicións legais vixentes no momento da sinatura do convenio algún dos seus pactos, este quedará nulo na súa totalidade, comprometéndose ambas a negocialo de novo.
Artigo 6º.-Comisión paritaria.
Co obxecto de velar pola correcta aplicación e cumprimento do contido deste convenio, créase unha comisión mixta paritaria que entenderá de tódalas cuestións relacionadas coa interpretación das normas contidas nel.
A comisión mixta paritaria estará formada por dous traballadores (nomeados polo sindicato máis representativo dentro da empresa) e dous representantes da empresa. Cada parte poderá nomear un asesor, que terá voz pero non voto.
Para que exista acordo, requirirase o voto acorde da metade máis un dos membros da comisión.
Das reunións realizadas pola comisión levantarase acta, na que figurarán as decisións tomadas. As actas deberán ser asinadas pola totalidade de membros asistentes a elas.
A comisión reunirase cando o solicite unha das partes.
Capítulo II
Xornada laboral
Artigo 7º.-Xornada.
A xornada será de 40 horas semanais.
Artigo 8º.-Horarios.
As quendas de traballo poderán ser continuadas ou partidas. Naqueles casos nos que se realicen de forma continuada haberá un período de descanso de 30 minutos.
Entre quenda e quenda de traballo terán que transcorrer, como mínimo, 12 horas.
Os días de descanso en cómputo anual serán os mesmos para todo o persoal.
A organización do traballo é competencia da empresa, aínda que os cuadrantes de traballo serán negociados cos representantes legais dos traballadores da empresa.
Artigo 9º.-Vacacións.
Todo o persoal desfrutará de vacacións retribuídas de 33 días naturais. Aqueles traballadores cunha antigüidade inferior a un ano desfrutarán dos días correspondentes por vacacións de forma proporcional á súa antigüidade.
O calendario de vacacións será pactado entre a empresa e a representación legal dos traballadores. Para tal efecto, os representantes dos traballadores presentarán unha proposta de cadro de vacacións antes do 30 de outubro de cada ano.
Tódolos traballadores terán dereito a 15 días de vacacións durante os meses de xullo ou agosto e 18 días fóra deste período.
Artigo 10º.-Permisos e licencias.
Os traballadores poderán gozar de permiso retribuído nos seguintes casos:
-Por nacemento de fillo, 5 días.
-Por matrimonio do traballador/a, 20 días.
-Por enfermidade grave ou falecemento de cónxuxe ou parella estable, ata terceiro grao de consanguinidade ou afinidade, 4 días.
-Por matrimonio de fillos ou pais, 1 día.
Cando se teña que realizar un desprazamento de máis de 80 km corresponderán 2 días máis, se é o caso.
En caso de visita médica nos servicios da Seguridade Social e mediante xustificante de consulta, concederase o tempo necesario para ela.
O traballador terá dereito a desfrutar de xornada retribuída de 7 días por asuntos propios, que como único requisito para a súa adxudicación, se esixirá a súa petición por escrito cunha anticipación de 48 horas, como mínimo. Cando a petición dalgún destes días a realice máis do 10% do cadro de persoal activo nesa data, a representación legal dos traballadores e da empresa abordarán as condicións precisas para o seu desfrute.
Capítulo III
Ascensos
Artigo 11º.-Ascensos e promocións.
Cando na empresa se produzan vacantes, se creen ou aumenten certos postos de traballo (tanto mandos intermedios como categorías medias), antes de contratar persoas alleas a ela, tratarase de cubrir estas prazas con traballadores de cadro de persoal, pasándose a cubri-las vacantes dos traballadores promocionados polas novas contratacións.
Cando un traballador realice traballos de categoría superior durante máis de 90 días ininterrompidos ou de 120 días alternos dentro do mesmo ano, concederáselle a categoría superior, figurando esta na correspondente escala.
Tódolos traballadores terán dereito á formación profesional e á promoción de traballo, segundo establece o Estatuto dos traballadores no seu artigo 22º.
Tódolos traballadores que realicen estudios ou formación profesional en centros oficiais poderán solicitar quenda de traballo adecuada a eles, a súa concesión, logo de estudio e aprobación, realizarase por acordo entre os representantes legais dos traballadores e a empresa. Os permisos necesarios non excederán de 8 días naturais ó ano retribuídos, para concorrer a exames, sen alteración nin diminución dos seus dereitos laborais.
Capítulo IV
Axudas sociais
Artigo 12º.-Incapacidade temporal (IT).
Aboarase o 100% en tódolos casos, sen ningún límite de tempo.
Artigo 13º.-Xubilación.
Será recomendada ós 64 anos, sempre que o traballador teña cuberto o período de carencia na Seguridade Social, para tal efecto e segundo o estipulado no R.D. 1194/1985, a empresa comprométese a substituí-lo traballador xubilado por outro contratado nas mesmas condicións.
Establécese para o persoal que se xubile anticipadamente unha gratificación na contía seguinte:
-Ós 63 anos: 2.554,30 euros.
-Ós 62 anos: 3.005,06 euros.
-Ós 61 anos: 3.155,31 euros.
-Ós 60 anos: 3.455,82 euros.
Capítulo V
Dereitos sindicais
Artigo 14º.-Información sobre a contratación.
A dirección da empresa estará obrigada a facilitarlles ós representantes dos traballadores información periódica sobre contratación, que incluirá:
-Previsión en materia de emprego e contratación.
Modalidades de contratación.
Grao de cumprimento das previsións anteriores. Esta información entregarase trimestralmente.
-Os sindicatos asinantes deste convenio serán consultados previamente á adopción de decisións empresariais en materia de:
Número de traballadores que se deben contratar.
Modalidades de contratos e número deles.
Datas de formalización dos contratos e duración deles.
Modo de selección do persoal.
No caso de que as decisións empresariais non se realicen logo da consulta cos representantes legais dos traballadores, entenderanse inexistentes as circunstancias que xustifican a contratación temporal e, polo tanto, as relacións laborais serán consideradas como indefinidas.
Capítulo VI
Seguridade e hixiene
Artigo 15º.-Vestiario. Servicio O.R.A.
-Inverno:
Un anorak impermeable.
Dous pantalóns.
Dúas saias.
Dúas camisas de manga longa.
Unha chaqueta que faga xogo cos pantalóns ou coas saias.
Unha gorra.
Un par de luvas de pel.
Unha gravata.
Medias para o persoal feminino.
Un par de zapatos.
Dous pares de calcetíns.
-Verán:
Dous pantalóns.
Dúas saias.
Dúas camisas manga curta.
Unha chaqueta que faga xogo cos pantalóns ou coas saias.
Unha gravata.
Medias para o persoal feminino.
Unha gorra.
Un par de luvas de pel.
Un par de zapatos.
Dous pares de calcetíns.
As roupas de traballo e calzado serán renovables de ano en ano.
Para os traballadores que, por necesidades físicas e prescrición facultativa, precisasen modificacións na súa roupa de traballo, estas serán efectuadas por conta da empresa.
Artigo 16º.-Asistencia xurídica.
Tódolos traballadores terán dereito a que a empresa lles proporcione a asistencia de avogado e procurador desde o inicio á fin do proceso xurídico, e nos casos nos que pola prestación e durante o desenvolvemento do seu cometido producisen algún tipo de agresión persoas alleas á empresa, sempre que o traballador non incorrese en neglixencia ou comportamento doloso ou culpable.
Artigo 17º.-Seguro de morte ou invalidez.
Establécese unha póliza de morte ou invalidez para cada un dos traballadores da empresa durante a súa permanencia en activo nela, consistente en:
-27.045,54 euros, en caso de morte natural.
-27.045,54 euros en caso de morte ou invalidez por accidente.
* Quedando exentos desa póliza tódolos traballadores maiores de 65 anos.
A póliza producirá efectos a partir da data en que se asine o citado convenio. As primas deste seguro son por conta da empresa, a cal deberá dar copia ós representantes legais dos traballadores.
-Indemnizacións por falecemento.
A empresa aboará catro mensualidades completas (salario base máis antigüidade) do mes completo no que faleza sen ter en conta o día en que tal feito aconteza, así como a cantidade que se aboará por lutus, que será de 1.202,02 euros.
Artigo 18º.-Protección ó embarazo.
A traballadora xestante terá dereito a ocupar durante o seu embarazo o seu posto de traballo e unha quenda distinta á súa se existise prescrición do facultativo que atende o seu embarazo, sen modificación de categoría nin mingua dos seus dereitos económicos.
Durante a baixa de IT por embarazo, a traballadora terá dereito a percibi-lo 100% de tódolos seus conceptos salariais.
A traballadora embarazada terá permisos retribuídos para preparación ó parto, así como dereito a elixi-la data das súas vacacións regulamentarias. Os cursos de preparación ó parto poderán realizarse en horas laborables, que serán retribuídas.
Artigo 19º.-Pagas extraordinarias.
Establécense dúas pagas extraordinarias, en contía de salario base, complementos e antigüidade, que serán aboadas:
-A de verán coa nómina do mes de xuño.
-A de Nadal con anterioridade ó 20 de decembro.
Así mesmo, establécese unha participación nos beneficios, que consistirá no reparto lineal entre tódolos traballadores dunha cantidade equivalente ó 2% remanente obtido no servicio O.R.A. Este remanente xustificarase mediante a liquidación presentada ó concello correspondente ó ano anterior. Esta paga farase efectiva durante os 3 meses seguintes ó devengo.
O aboamento farase efectivo antes do día 31 de marzo de cada ano.
Artigo 20º.-Antigüidade.
O persoal afectado por este convenio devengará as antigüidades de acordo coas seguintes táboas:
-De 3 a 6 anos: 5%.
-De 6 a 9 anos: 10%.
-De 9 a 12 anos: 15%.
-De 12 a 15 anos: 20%.
-De 15 a 18 anos: 25%.
-De 18 a 21 anos: 34%.
-De 21 a 24 anos: 48%.
-De 24 ou máis anos: 58%.
Estas porcentaxes aplicaranse sobre o salario base vixente en cada momento.
Artigo 21º.-Quebranto de moeda.
Aboaráselle a cada traballador un 2% sobre tarxeta que venda. O seu devengo realizarase antes de remata-lo primeiro e segundo semestre de cada ano.
Capítulo VII
Retribucións
Artigo 22º.-Mantemento de emprego.
O número de traballadores fixos será de 14 como mínimo. Non obstante, a empresa comprométese a aumentar, na medida do posible, o número de traballadores de contratación ata chegar a 17, durante a vixencia do convenio.
Artigo 23º.-Táboas salariais para o ano 2002, 2003 e 2004.
Segundo táboa anexa.
Artigo 24º.-Incremento salarial.
O incremento salarial deste convenio será:
-Ano 2002: o IPC real de 2001.
-Ano 2003: o IPC real de 2002 máis un punto.
-Ano 2003: o IPC real de 2003 máis dous puntos.
* Este incremento salarial aplicaráselles a tódolos conceptos salariais.
Asemade, tódolos traballadores percibirán unha axuda de compensación social que cobrarán na nómina do mes de setembro, polo importe de 420,71 euros, para o ano 2002 e, para os restantes anos de vixencia do convenio, incrementarase esa contía en 60,10 euros/ano de vixencia. Mantéñense as actuais cantidades do complemento de transporte, incrementando no salario base o resultante da aplicación do incremento pactado ó salario base.
Artigo 25º.-Garantía do posto de traballo.
O cambio de titularidade da empresa non extinguirá por si mesmo a relación laboral, quedando o novo empresario subrogado nos dereitos e nas obrigas do anterior.
Artigo 26º.-Excedencia laboral.
É a que se concede por un prazo superior a un ano e inferior a 5, sen que se compute o tempo que dure esta situación para efectos de aumentos por anos de servicio.
Deberá ser solicitada por escrito polo delegado de persoal. O prazo de concesión ou denegación non poderá exceder de 20 días naturais.
A negativa só poderá basearse nas seguintes causas:
-Prazo perentorio de realización de servicio.
-Non levar como mínimo un ano de servicio na empresa.
-Ter desfrutado doutra excedencia nos últimos cinco anos.
A petición de excedencia voluntaria deberá despacharse favorablemente cando sexa causa de remate ou ampliación de estudios, esixencias familiares de carácter ineludible ou outra análoga, que sexa acreditada debidamente polo traballador.
Se o traballador non solicitase o reingreso 30 días antes do remate do prazo sinalado para a excedencia, perderá o dereito ó seu posto de traballo na empresa.
O traballador incorporarase automaticamente ó remata-la mencionada excedencia.
Táboa salarial ano 2002
14 pagas mes 14 pagas mes 14 pagas mes 14 pagas mes
Categorías Salario bruto
Salario base
Incentivo
Transporte
Vixilante 772,10 591,58 34,77 145
Encargado servicio 1.154,08 763,72 122,97 267
Encargado 1.076,60 679,78 140,75 256
Administrativo 1.080,87 640,73 146,00 294
* Paga mes de setembro: 432,07 euros.
CONSELLERÍA DE FAMILIA E PROMOCIÓN DO EMPREGO,
MULLER E XUVENTUDE
