O Pleno da Corporación municipal do Concello de Cerceda, reunido en sesión celebrada o día trinta de xullo de dous mil un, acordou ceder á Comunidade Autónoma de Galicia o predio situado no termo municipal de Cerceda, destinado á construcción dunha planta de tratamento de residuos voluminosos. A Secretaría Xeral e do Patrimonio tramitou o correspondente expediente de aceptación de cesión, de conformidade co disposto nos artigos 16, 17 e 23 da Lei 3/1985, do 12 de abril, do patrimonio da Comunidade Autónoma de Galicia e 33, 34 e 38 do Decreto 50/1989, do 9 de marzo, polo que se aproba o regulamento para a execución da dita lei.
Na súa virtude, por proposta do conselleiro de Economía e Facenda, feita nos termos nos que o Concello de Cerceda acordou a cesión e logo de deliberación do Consello da Xunta de Galicia na súa reunión do día trinta de xullo de dous mil dous,
DISPOÑO:
Artigo 1º
Acéptase a cesión, feita polo Concello de Cerceda, a título gratuíto, do predio de 12.359 m, situado no termo municipal de Cerceda e cos seguintes lindeiros: ó norte, co resto do predio matriz, hoxe de José Luis Díaz Méndez e Antonio Iglesias Carrero; ó sur, co río Acevedo e coa pista que vai de oeste a leste desde a estrada de Xesteda á zona de Renfe; ó leste, terreos da Renfe e co resto do predio matriz; ó oeste, río Acevedo e coa parcela «H-C».
O predio descrito figura inscrito a nome do Concello de Cerceda no Rexistro da Propiedade de Ordes co número 13.995, no folio 63, do libro 93 de Cerceda no tomo 727.
Artigo 2º
O predio cedido destinarase á construcción dunha planta de tratamento de residuos voluminosos.
Artigo 3º
A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e á inscrición do ben no Rexistro da Propiedade a nome da Comunidade Autónoma de Galicia.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo
tódolos trámites necesarios para a efectividade do presente decreto.
Santiago de Compostela, trinta de xullo de dous mil dous.
Manuel Fraga Iribarne
Presidente
José Antonio Orza Fernández
Conselleiro de Economía e Facenda