Aprobados pola Comisión de Goberno deste concello -na sesión que tivo lugar o día 21 de xuño de 2002-, tanto o prego de cláusulas administrativas particulares, como o prego de prescricións técnicas, que haberán de rexe-lo concurso, por procedemento aberto, para adxudicar -mediante concesión- a xestión indirecta do servicio público da piscina cuberta climatizada e da piscina municipal descuberta, exponse ó público nas oficinas municipais, por un prazo de oito días hábiles, para efectos de reclamacións.
Transcorrido o dito prazo sen presentación de reclamacións -e de conformidade co disposto no artigo 122, número 2, do Real decreto lexislativo 781/1986, do 18 de abril, ábrese un período de licitación para proceder á dita adxudicación, se ben esta licitación se aprazará canto resulte necesario, e así se fará público, no suposto de se formularen reclamacións contra os ditos pregos de condicións.
O contido do prego de cláusulas administrativas particulares é o seguinte:
I. Obxecto do contrato. A contratación mediante concesión dos seguintes servicios nas dúas piscinas municipais de Arzúa:
a) Servicios administrativos.
b) Atención e control dos usuarios.
c) Servicios técnico-docentes, incluíndo profesores e monitores.
d) Servicio de socorrismo.
e) Cobramento das taxas aprobadas polo concello ós usuarios.
f) Outros previstos no prego de prescricións técnicas.
II. Duración do contrato. Será dun ano, contado desde a data de formalización do contrato coa empresa que resulta adxudicataria.
Se tres meses antes de rematar aquel prazo ningunha das partes lle manifestase á outra o seu propósito de rescindi-lo contrato, entenderase prorrogado por outra anualidade, sen que o total das prórrogas anuais poida exceder de tres; sendo, en consecuencia, catro o período de duración máxima do contrato.
III. Prezo do contrato. O prezo que satisfará anualmente o concello á empresa concesionaria será de trinta mil euros (30.000 euros), para o aboamento dos cales se desagregará ese importe en doce mensualidades iguais, que serán ingresadas nos primeiros días de cada mes na conta bancaria que designe o concesionario.
A devandita cantidade poderá ser mellorada á baixa a favor do concello cando se presente a proposta económica.
O importe deste prezo revisarase cada seguinte anualidade -no suposto de prórroga do contrato-, actualizándose na base ó índice de prezos de consumo que publique o Instituto Nacional de Estatística ou outro organismo que o substitúa.
E iso tendo en conta que tamén formará parte do prezo do contrato -que vai percibi-la empresa concesionaria- o importe da recadación das taxas que houbesen de satisface-los usuarios das dúas piscinas (climatizada e descuberta), por unha contía estimada para o primeiro ano de setenta e dous mil euros (72.000 euros); coa observación que a dita contía estará suxeita ás variacións que poida experimentar en sucesivas anualidades.
De maneira que se, ó cabo do primeiro ano de duración do contrato, se comprobase que a recadación obtida polas ditas taxas excedese da previsión que quedou fixada, o seu exceso repartirase ó 50% entre o concello e a empresa concesionaria.
IV. Tarifas. Corresponderá á empresa concesionaria a xestión e a recadación das taxas que haberán de satisface-los usuarios das piscinas municipais, conforme a ordenanza fiscal reguladora da taxa pola prestación do servicio da piscina municipal descuberta e conforme a ordenanza fiscal reguladora da taxa pola prestación do servicio da piscina climatizada municipal.
V. Relación cos usuarios. Axustaranse ó previsto no Regulamento de utilización da piscina climatizada municipal e doutras instalacións existentes no mesmo edificio; así como ás demais normas que fixe o concello.
VI. Capacidade para contratar. Estarán capacitadas para contrata-las persoas xurídicas, españolas ou estranxeiras, que teñan plena capacidade de obrar e acrediten a solvencia económica e financeira así como a solvencia técnica, nos termos dos artigos 16 e 19 do texto refundido da Lei de contratos das administracións públicas (aprobado polo Real decreto lexislativo 2/2000, do 16 de xuño); sen que poidan estar afectadas por ningunha das circunstancias que enumera o artigo 20 da dita lei como prohibitivas para contratar.
VII. Garantía provisional. Para poder participar no concurso será necesario acredita-la prestación dunha fianza provisional por importe de 600 euros, que poderá constituírse en calquera das formas previstas no artigo 35 do Real decreto lexislativo 2/2000, do 16 de xuño.
VIII. Garantía definitiva. Será requisito previo e necesario para a formalización do contrato e consistirá no 4% do prezo de adxudicación, comprendendo no dito prezo o importe da recadación polas taxas que houbese de percibi-la empresa dos usuarios, estimada en 72.000 euros, e poderá constituírse en calquera das formas previstas no artigo 36 do Real decreto lexislativo 2/2000, do 16 de xuño.
IX. Presentación de proposicións. As proposicións, axustadas ó modelo que figura neste prego de cláusulas administrativas, xuntamente coa documentación esixida a través deste, presentaranse no rexistro xeral deste concello, calquera día hábil, en horas de 9 a 14, durante os trece días naturais contados desde o seguinte a aquel no que rematase o prazo dos oito días hábiles de exposición ó público para reclamacións deste mesmo prego de cláusulas administrativas no BOP e no Diario Oficial de Galicia.
X. Apertura das proposicións. A mesa de contratación, en acto público, que se celebrará ás doce horas do primeiro día hábil (que non sexa sábado) seguinte a aquel en que conclúa o prazo de presentación de propostas, levará a cabo a apertura das proposicións presentadas, empezando para iso polos sobres B), co obxecto de cualificar en sentido favorable ou desfavorable a documentación contida nestes; neste último caso poderá conceder un prazo non superior a dez días para que o licitador emende a documentación presentada que non contivese defectos substanciais.
Logo procederase á apertura dos sobres A), reflectindo no acto os importes das ofertas económicas.
Seguidamente formularase á Comisión de Goberno a proposta de adxudicación a favor da empresa que obtivese a maior puntuación neste procedemento de concurso.
XI. Criterios de valoración. Serán os seguintes:
a) Menor prezo ofertado. Ata un máximo de 10 puntos.
b) Persoal que vaia empregar, cualificación e categoría profesional. Ata un máximo de 15 puntos.
c) Melloras propostas sen ningún custo para o concello. Ata un máximo de 10 puntos.
d) Plan de traballo, equipo técnico, útiles e maquinaria empregada, programación. Ata un máximo de 15 puntos.
XII. Modelo de proposición económica. O recollido na cláusula 14 do referido prego da cláusulas administrativas particulares, para a súa inclusión dentro do sobre A.
Arzúa, vintecinco de xuño de dous mil dous.
Manuel Moscoso López
Alcalde