Por Orde do 18 de febreiro de 2002 convocáronse catro bolsas de formación en réxime de empresa tutelada. Rematado o proceso de selección quedan vacantes dúas bolsas para a realización dun proxecto de xestión e producción de cría de bivalvos na modalidade de empresa tutelada, na que a entidade formadora, Instituto Galego de Formación en Acuicultura, facilita un período de práctica laboral nun ámbito de empresa ficticia na que se reproducen os medios e procesos de producción e xestión reais, pero que a titularidade dos medios de producción é da entidade responsable do proceso de formación.
Existindo crédito suficiente na aplicación orzamentaria correspondente, resulta necesario proseguir ese período de práctica laboral e seleccionar outro equipo de dúas persoas para participar nese itinerario de perfeccionamento profesional.
Polo exposto, esta consellería
DISPÓN:
Artigo 1º
Con cargo á aplicación orzamentaria 12.04.322S.480.0 Formación Profesional FSE, dos orzamentos xerais da Comunidade Autónoma de Galicia para o ano 2002, convócanse dúas bolsas, cofinanciadas polo Fondo Social Europeo, para a especialización posformativa para alumnos de formación profesional específica do Igafa.
Artigo 2º
A solicitude e concesión destas axudas rexerase polas bases do anexo I da Orde do 18 de febreiro de 2002 (DOG nº 41, do 26 de febreiro).
Artigo 3º
O importe global máximo que acadará o conxunto das axudas é de 16.200 euros.
Disposicións derradeiras
Primeira.-Facúltase a directora xeral de Innovación e Desenvolvemento Pesqueiro para dicta-las normas necesarias para o desenvolvemento e execución desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 28 de xuño de 2002.
Enrique César López Veiga
Conselleiro de Pesca e Asuntos Marítimos