A disposición adicional segunda do decreto 302/2001 impón a obriga de crear unha comisión de seguimento para garanti-lo axeitado cumprimento do Plan Eólico de Galicia.
O devandito plan eólico é o elemento angular da planificación eólica na Comunidade Autónoma e a partir deste documento estructúrase toda a acción eólica en territorio galego.
Como é ben sabido, a concreción desta planificación realízase a través de parques eólicos e na tramitación deles concorren distintas competencias que se deben ter en conta e que poden afecta-la efectiva realización da infraestructura.
Por todo iso e dentro do novo marco procedemental no que se establece unha convocatoria previa co obxecto de determinar qué solicitudes son susceptibles de inicia-la súa tramitación parece conveniente a creación dunha comisión interdepartamental na que se poidan anticipar e resolve-las dificultades que puidesen xurdir fomentándose así un mecanismo de coordinación e obténdose unha maior eficiencia no desenvolvemento do plan sectorial antes nomeado.
Por todo o anterior,
DISPOÑO:
Artigo 1º.-Creación.
Pola presente orde créase a Comisión de Seguimento de Plan Eólico de Galicia coa composición e funcións que se establecen nos artigos seguintes.
Artigo 2º.-Composición.
A comisión de seguimento do Plan Eólico de Galicia estará composta polos seguintes membros:
Presidente: director xeral de Industria, Enerxía e Minas.
Vocais:
Director xeral de Calidade e Avaliación Ambiental.
Director xeral de Conservación da Natureza.
Director xeral de Urbanismo.
Director xeral de Turismo.
Director xeral de Patrimonio Cultural.
2 representantes da Consellería de Industria e Comercio.
Secretario: subdirector xeral de Enerxía da Consellería de Industria e Comercio.
Tódolos titulares terán un suplente que será designado na reunión constitutiva da comisión.
Artigo 3º.-Funcións.
Establécense como funcións da comisión as se-
guintes:
-Debater acerca das solicitudes de autorización de parques eólicos.
-Estudiar, antes da resolución de cada convocatoria anual, de autorización de parques eólicos, a localización dos distintos proxectos presentados.
-Informar, de maneira previa, a título orientativo das posibles dificultades de tramitación de cada unha das solicitudes.
-Seguimento da execución material das planificacións eólicas anuais que se realicen.
-Colaborar na axilización da tramitación dos distintos proxectos eólicos admitidos a trámite.
Artigo 4º.-Funcionamento.
A comisión reunirase unha vez cada mes con carácter ordinario e, ademais, con carácter extraordinario, cantas veces sexa convocada polo presidente.
Para o funcionamento da comisión e co fin de aborda-lo tratamento de aspectos ou cuestións específicas, poderán constituírse subcomisións, cando así o acorde a comisión en Pleno.
As subcomisións terán carácter temporal e unha vez cumprido o seu cometido entenderanse disoltas.
Eventualmente, e logo de acordo da totalidade dos membros da comisión poderán participar expertos externos, tanto naquela como nas subcomisións que poidan constituírse.
Disposición adicional
No prazo dun mes desde a entrada en vigor da presente disposición deberá constituírse a Comisión de Seguimento do Plan Eólico de Galicia, de acordo co disposto nela.
Disposición derradeira
Primeira.-Autorízase o director xeral de Industria, Enerxía e Minas para dicta-las disposicións que sexan precisas para o desenvolvemento e execución desta orde.
Segunda.-Esta orde entrará en vigor o día seguinte ó da súa publicación no DOG.
Santiago de Compostela, 13 de xuño de 2002.
Juan Rodríguez Yuste
Conselleiro de Industria e Comercio
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA