O xerente xeral do Complexo Hospitalario Universitario de Santiago de Compostela propuxo a iniciación dun expediente para a contratación dun seguro de vida para o persoal do Hospital Psiquiátrico de Conxo.
Entre as facultades delegadas en materia de contratación pola Orde do 14 de marzo de 2002, sobre delegación de competencias en órganos centrais e periféricos do Servicio Galego de Saúde nos directores xerentes de institucións sanitarias ou nos seus equivalentes, non se atopa a de actuar como órgano de contratación nos contratos imputables ós seus respectivos centros que se refiran a contratos privados.
Así mesmo, a conveniencia de proceder á delegación da competencia no citado centro, obedece a que os seus responsables dispoñen tanto do coñecemento coma dos medios necesarios para a tramitación da contratación prevista, o que sen dúbida contribuirá á consecución do obxectivo que con ela se busca.
Esta delegación faise de conformidade cos principios recollidos no artigo 13 da Lei 30/1992, de 26 de novembro (modificada pola Lei 4/1999), do réxime xurídico das administracións públicas e do procedemento administrativo común; e nos artigos 43 e 44 da Lei 1/1983, do 22 de febreiro (modificada pola Lei 11/1988, do 20 de outubro), reguladora da Xunta e do seu presidente.
Na súa virtude, facendo uso das facultades que me confiren o artigo 38 da Lei 1/1983, do 22 de febreiro (modificada pola Lei 11/1988, do 20 de outubro) reguladora da Xunta e do seu presidente; o artigo 3.2º do Decreto 45/2002, do 8 de febreiro, polo que se establece a estructura orgánica do Servicio Galego de Saúde; os artigos 9 b) e 72.4º do Decreto lexislativo 1/1999 (modificado polas leis 5/2000, do 28 de decembro, e 8/1999, do 30 de decembro), que aprobou o texto refundido da Lei de réxime financeiro e orzamentario de Galicia; e tendo en conta o disposto no artigo 13 da Lei 30/1992, do 26 de novembro (modificada pola Lei 4/1999), de réxime xurídico das administracións públicas e do procedemento administrativo común; e nos artigos 43 e 44 da Lei 1/1983 (modificada pola Lei 11/1988, do 20 de outubro) reguladora da Xunta e do seu presidente,
DISPOÑO:
Artigo único.-Delegar no xerente xeral do Complexo Hospitalario Universitario de Santiago de Compostela a competencia para actuar como órgano de contratación para a realización de tódolos trámites necesarios para a contratación, polo procedemento aberto mediante concurso, dun seguro de vida para o persoal do Hospital Psiquiátrico de Conxo.
Disposición derradeira
Este orde entrará en vigor o día seguinte ó da súa publicación no Diario Oficial de Galicia.
Santiago de Compostela, 10 de xuño de 2002.
José María Hernández Cochón
Conselleiro de Sanidade e presidente do Servicio Galego de Saúde