A mobilidade do persoal funcionario entre as administracións das distintas comunidades autónomas e a Administración do Estado vén garantida e regulada, co carácter de base do réxime estatutario dos funcionarios públicos ó abeiro do artigo 149.1º.18 da Constitución española, no artigo 17 da Lei 30/1984, do 2 de agosto, de medidas para a reforma da función pública, modificada polo artigo 39.2º da Lei 55/1999, do 29 de decembro, de medidas fiscais, administrativas e da orde social (BOE nº 312, do 30 de decembro).
Pola súa parte, o artigo 42 da Lei 4/1988, do 26 de maio, da función pública de Galicia establece, de acordo coa lexislación básica do Estado, o dereito á mobilidade dos funcionarios procedentes doutras administracións públicas de conformidade coas condicións e requisitos que determine previamente a Xunta de Galicia nas relacións de postos de traballo.
En consecuencia, para que determinados postos poidan ser ocupados por funcionarios doutras administracións, é necesario previamente modifica-la orde da Consellería da Presidencia e Administración Pública do 21 de novembro de 1989 (DOG nº 232, do 4 de decembro), co obxecto de crear unha nova columna no anexo á citada orde na que se recolla a adscrición a administracións públicas.
Polo tanto, oída a Comisión de Persoal, e en uso das competencias reguladas no artigo 13 da Lei 4/1988, do 26 de maio, da función pública de Galicia.
DISPOÑO:
Artigo 1º
Modifícase o artigo 7 da citada orde, engadindo un novo parágrafo a continuación da alínea g:
Especificarase o tipo de Administración ó que debe pertence-lo titular do posto de traballo, que comunmente será a Administración da Xunta de Galicia. As claves que se empregarán serán as seguintes:
AXG: adscrición exclusiva a funcionarios da Administración da Xunta de Galicia.
A11: adscrición indistinta a funcionarios da Administración da Xunta de Galicia, Administración do Estado, Administración de comunidades autónomas.
A12: adscrición indistinta a funcionarios da Administración da Xunta de Galicia, Administración do Estado, Administración de comunidades autónomas e Administración local.
A13: adscrición indistinta a funcionarios da Administración da Xunta de Galicia, Administración do Estado, Administración de comunidades autónomas e Administración de xustiza.
A14: adscrición indistinta a funcionarios da Administración da Xunta de Galicia, Administración do Estado, Administración de comunidades autónomas, e forzas e corpos de seguridade do Estado.
A15: adscrición indistinta a funcionarios da Administración da Xunta de Galicia, Administración do Estado, Administración de comunidades autónomas, persoal estatutario do Sergas e persoal laboral da Administración da Xunta de Galicia.
A16: adscrición indistinta a funcionarios da Administración da Xunta de Galicia, Administración do Estado, Administración de comunidades autónomas, e persoal estatutario do Sergas.
A17: adscrición indistinta a funcionarios da Administración da Xunta de Galicia, Administración do Estado, Administración de comunidades autónomas e persoal docente con destino na Comunidade Autónoma de Galicia.
A20: outras adscricións que se definirán nas relacións de postos de traballo.
Artigo 2º
No anexo á dita orde engádese unha nova columna a continuación da 7, coa denominación: «Adscrición ás administracións públicas».
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 12 de xuño de 2002.
Jaime Pita Varela
Conselleiro da Presidencia, Relacións
Institucionais e Administración Pública