O Servicio Galego de Saúde, co fin de mellora-la prestación da asistencia sanitaria na Comunidade Autónoma, concedeu permisos de utilización temporal a favor de distintos concellos, de varias ambulancias propiedade deste.
Algúns deses vehículos, en virtude do tempo transcorrido, non son útiles na actualidade para a realización de labores de ambulancia e, de acordo co Decreto 42/1998, do 15 de xaneiro, polo que se regula o transporte sanitario, rebasan o tempo máximo establecido para o seu destino con fins sanitarios. Por todo isto, os concellos de Cuntis, Maceda, Malpica, Moaña, Padrón, Poio, Riós, Ribeira e Taboadela solicitan a cesión dos vehículos que utilizan para ser destinados a outros fins que redunden no interese xeral do municipio.
Con este fin o Servicio Galego de Saúde tramitou o expediente de cesión dos devanditos vehículos, de conformidade co disposto no artigo 35 bis da
Lei 3/1985, do 12 de abril, do patrimonio da Comunidade Autónoma galega, e no artigo 96 bis do seu regulamento, aprobado polo Decreto 50/1989, do 9 de marzo, engadido polo Decreto 238/1998, do 24 de xullo.
Por todo o exposto e en uso das facultades que me confire o artigo 38 da Lei 1/1983, do 22 de febreiro, reguladora da Xunta e do seu presidente reformada pola Lei 11/1988, do 20 de outubro,
DISPOÑO:
Artigo 1º
Esta orde ten por obxecto acorda-la cesión da propiedade de determinados bens mobles automóbiles (descritos no seu anexo) a favor dos concellos de Cuntis, Maceda, Malpica, Moaña, Padrón, Poio, Riós, Ribeira e Taboadela.
Artigo 2º
A cesión queda sometida ás seguintes cláusulas:
a) Os bens cedidos destinaranse a fins de utilidade pública ou interese social do concello tal e como esixe o artigo 96 bis do Decreto 50/1989 e 35 bis da Lei 3/1985, do patrimonio da Comunidade Au-
tónoma.
b) Coa cesión outorgaráselle ó concello a propiedade do vehículo, comprometéndose este a realizar ante a Xefatura Provincial de Tráfico os trámites precisos para o cambio da titularidade do vehículo.
c) Os bens cedidos destinaranse a outros fins de utilidade pública ou interese social do concello, debendo este proceder a retirar do vehículo todo anagrama ou rotulación que puidera identificalo como vehículo sanitario, así como a aboa-los gastos que puidese orixina-la transformación do devandito vehículo.
Artigo 3º
A cesión formalizarase mediante acta subscrita polo director xeral da División de Recursos Económicos do Servicio Galego de Saúde e o órgano competente dos distintos concellos, debendo constar nela o acordo de cesión e a aceptación do cesionario.
Disposicións derradeiras
Primeira.-O Servicio Galego de Saúde, a través de seu órgano competente, realizará os trámites necesarios para a efectividade de canto se dispón na presente orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 25 de abril de 2002.
José María Hernández Cochón
Conselleiro de Sanidade
ANEXO
Relación de vehículos:
Vehículo Matrícula Concello
Nissan Vanette PO-2434-AF Cuntis Nissan Serena C-1144-BL Maceda Nissan Vanette C-9482-BD Malpica Nissan Serena C-1143-BL Moaña Nissan Vanette C-4935-AL Padrón Nissan Vanette C-9091-BG Poio Nissan Vanette C-5388-AV Riós Nissan Vanette C-6137-BS Ribeira Nissan Vanette OR-8488-K Taboadela