Dentro do plan de actividades da Escola Galega de Administración Pública para o 2002 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989,
do 10 de xullo, de modificación da anterior, convócanse unhas Xornadas sobre nacionalidade e inmigración, convocatoria que se desenvolverá conforme as seguintes bases:
1. Obxectivos.
Un dos temas que é capaz de xuntar actualidade e interese, tanto para os que se preocupan pola emigración, coma para os estudiosos da nacionalidade española e para os xuristas en xeral, coincide co movemento de reforma da regulación da nacionalidade española, que recibiu o pulo inequívoco do Congreso a través da unánime toma en consideración, o pasado día 5 de febreiro, das tres proposicións de lei promovidas desde outros tantos grupos parlamentarios de ámbito nacional, incluído o que lle dá soporte ó Goberno.
O fío conductor das reformas impulsadas, como non podía ser doutro modo, enlaza coa preocupación da nosa emigración, interesada loxicamente en conservar, transmitir ou recupera-la nacionalidade española non obstante o seu arraigamento transitorio no estranxeiro. Ó igual que noutras ocasións, as proposicións denotan unha acentuada preocupación por dilata-lo ius sanguinis como principio transmisor do estatus nacional, esbozando unha nova hipótese de opción que se lle ofrece á descendencia dos emigrantes, sen prexuízo de que se pondere complementariamente a oportunidade de redimensiona-lo principio do ius soli, progresando na dispensa da nacionalidade española a algúns dos nacidos en España de pais estranxeiros.
Máis alá dos supostos de atribución orixinaria da nacionalidade española, imponse reflexionar sobre os requisitos e dimensións da concesión por residencia, repensando a duración da estancia requirida, xa na hipótese xeral, xa en supostos particularizados, e, o que non é menos importante para os que emigraron, faise inaprazable reaxustar novamente as condicións de conservación e perda da nacionalidade española por parte dos que adquiren ou posúen outra nacionalidade estranxeira.
Trátase a través destas xornadas de abrirmos unha reflexión e debate sobre as cuestións antes sintetizadas.
2. Contido.
Trataranse estes temas:
-A nova opción ofrecida ós fillos de emigrantes e a reforma do sistema de perda.
-A adquisición por residencia: prazos e requisitos da permanencia no territorio español.
-A adquisición polo cónxuxe e, se é o caso, polo convivente de español ou española.
-A boa conducta cívica e o suficiente grao de integración para a concesión por residencia.
-A dobre nacionalidade como protección ós emigrantes españois e á súa descendencia.
-As novas condicións de recuperación da nacionalidade española.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos da Delegación Provincial da Consellería da Presidencia, Relacións Institucionais e Administración Pública na Coruña (Praza de Pontevedra, s/n, da citada cidade), os días 13 e 14 de xuño de 2002.
5. Inscrición.
-Prazo: remata o martes, día 11 de xuño de 2002.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 12 de xuño, de 8.30 a 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 15 de maio de 2002.
Domingo Bello Janeiro
Director da Escola Galega de Administración
Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA