Dentro dos programas de actividades que a Academia Galega de Seguridade ten previsto realizar no ano 2002 e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dun curso de dispensa de grao para policías locais, segundo o previsto no artigo 23 da Lei 3/1992, do 23 de marzo, de coordinación das policías locais, que deberá desenvolverse conforme as seguintes bases:
Obxectivos: o curso ten por obxectivo dota-los policías dunha formación teórico-práctica que lles permita acadar un nivel formativo adecuado, así como complementario en materia de actualización policial, que lles sexa útil no desempeño posterior da súa profesión, e ó mesmo tempo os dispensa dun grao na titulación do grupo D ó grupo C (bacharel), segundo o disposto na disposición transitoria terceira da Lei 3/1992, do 23 de marzo, de coordinación de policías locais de Galicia.
Destinatarios: o curso vai dirixido a todos aqueles policías locais de Galicia que non ingresaran no corpo de policía local a través da Academia Galega de Seguridade e poidan atoparse na situación prevista na disposición transitoria terceira da Lei 3/1992, do 23 de marzo, de coordinación das policías locais de Galicia, é dicir, que se atopen no emprego de cabo da policía local á entrada en vigor da Lei 3/1992, de coordinación de policías locais de Galicia.
Inscrición: a inscrición dos participantes será totalmente gratuíta, debéndose comunicar esta antes do 30 de maio de 2002 para efectua-la correspondente reserva de praza.
Prazas: sen límite.
Solicitudes:
1. Os policías que desexen asistir a este curso deberán remitir un escrito, a través do concello, á Academia Galega de Seguridade, solicitando a participación no curso de dispensa de grao para policías locais; para efectua-la correspondente reserva de praza para a realización do devandito curso.
2. O prazo para a remisión de escritos rematará o día 30 de maio de 2002.
3. Os escritos deberán enviarse á Academia Galega de Seguridade: avenida da Cultura, s/n, 36680 A Estrada.
4. O curso celebrarase unicamente no caso de que o número de solicitudes sexa igual ou superior a 10.
Contido e duración: o curso consta de dúas fases: unha primeira fase presencial e unha segunda fase a distancia. A primeira fase consta de 100 horas e comprende os seguintes módulos:
-Módulo I: actualización xurídico-normativa.
-Módulo II: operativa e práctica policial.
-Módulo III: comportamento socioprofesional.
A fase a distancia consta de cinco módulos, cunha duración total de 200 horas:
-Módulo IV: cálculo e lóxica matemática.
-Módulo V: ciencias naturais.
-Módulo VI: lingua, ortografía e literatura castelá.
-Módulo VII: historia e sociedade contemporánea.
-Módulo VIII: coñecemento do idioma e literatura galega.
Na modalidade de a distancia facilitaráselle ó alumno o material necesario e test de avaliación para remitir á AGS.
Datas:
-A presentación do curso farase o 3 de xuño de 2002 ás 9 horas, neste acto os alumnos recibirán a guía do curso e o material para o alumno correspondente á fase de distancia.
-O día 29 de xullo de 2002 é a data tope para a entrega dos traballos e cuestionarios correspondentes á primeira parte dos módulos a distancia.
-O día 9 de setembro de 2002 os alumnos deberán comparecer ás 9.30 horas na AGS para a realización dun exame e entrega dos traballos e cuestionarios correspondentes á segunda fase a distancia.
-O día 13 de setembro farase pública a lista de aprobados e no caso dos suspensos terán un exame extraordinario o día 16 de setembro ás 10 horas.
-O exame da fase de presencia terá lugar ás 20 horas do día 4 de xullo de 2002.
Desenvolvemento do curso: os alumnos da Academia Galega de Seguridade durante o seu período de permanencia na academia rexeranse polo regulamento de réxime interior desta, publicado no DOG do 28-7-1995, nº 144.
Certificado: ó remate do curso entregaráselles un certificado a aquelas persoas que superen as fases de a distancia e de presencia, respectivamente.
Este certificado habilitará para a dispensa dun grao na titulación do grupo D ó grupo C (bacharel), segundo o disposto na disposición transitoria terceira da Lei 3/1992, do 23 de marzo, de coordinación de policías locais de Galicia.
Modificacións: a Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.
A Estrada, 29 de abril de 2002.
Juan José Fariñas-Ferro Rodríguez
Director xeral da Academia Galega de Seguridade