Dentro do plan de actividades da Escola Galega de Administración Pública para 2002, e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Consellería de Asuntos Sociais, unhas Xornadas sobre promoción do voluntariado, convocatoria que se desenvolverá conforme as seguintes bases:
1. Obxectivos.
Informar sobre as principais liñas de actuación de voluntariado da Comunidade Autónoma de Galicia e dar a coñece-lo recentemente aprobado Plan Galego de Voluntariado, así como o rexistro de entidades de acción voluntaria e a web de voluntariado.
Que os responsables de entidades de acción voluntaria se impliquen activamente no desenvolvemento de acción voluntaria en Galicia e que os cidadáns en xeral coñezan os mecanismos de acceso ós programas de acción voluntaria.
2. Contido.
Trataranse estes temas:
-Liñas estratéxicas e directrices do Plan Galego de Voluntariado.
-Os programas municipais de voluntariado das grandes cidades.
-Os programas municipais de concellos rurais.
-O proxecto Interreg-III de implantación do voluntariado nos concellos fronteirizos con Portugal.
-O voluntariado nas organizacións non lucrativas.
-O voluntariado no sistema educativo.
-O rexistro de entidades de voluntariado en Galicia.
-A web do voluntariado.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse os días 11 e 12 de xuño de 2002 no salón de actos do edificio administrativo da Xunta de Galicia en Vigo, sito na praza da Estrela-Concepción Arenal nº 8 da citada cidade.
5. Inscrición.
-Prazo: remata o venres, día 7 de xuño de 2002.
-Tramitación de solicitudes: as solicitudes irán dirixidas ó director da Escola Galega de Administración Pública; polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando por teléfono, o día 10 de xuño, das 8.30 ás 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase neste documento a natureza da actividade e as datas da súa realización.
8. Retransmisión pola Internet.
As persoas interesadas en segui-lo desenvolvemento desta xornada pola Internet poden facelo a través do seguinte enderezo: www.egap.xunta.es.
Santiago de Compostela, 13 de maio de 2002.
Domingo Bello Janeiro
Director da Escola Galega de Administración
Pública