En virtude do disposto no artigo 29 da Lei 4/1993, do 14 de abril, de servicios sociais e do artigo 6 do Decreto 243/1995, do 28 de xullo, polo que se regula o réxime de autorización e acreditación de centros de servicios sociais, os centros de servicios sociais propios da Comunidade Autónoma crearanse mediante decreto precisándose orde da consellería competente para o inicio das súas actividades.

A entrada en vigor da Lei orgánica 5/2000, do 12 de xaneiro, reguladora da responsabilidade penal dos menores, fai necesaria a adaptación do centro de menores Xesús de Nazaret ás esixencias desta, que pasan necesariamente por unha fonda remodelación do centro, tanto na súa estructura física como na súa natureza.

De conformidade co disposto no artigo 25 do Decreto 243/1995 citado, para o cesamento de actividades dun centro, tanto temporal como definitivo, será preceptiva a obtención do correspondente permiso. O cesamento definitivo total vén referido á finalización de actividades de prestación respecto de tódolos servicios.

Polo exposto e en uso das facultades que me son atribuídas polo Decreto 488/1997, do 26 de decembro, polo que se establece a estructura orgánica desta consellería, modificado polos decretos 117/1999, do 23 de abril, 202/2000, do 21 de xullo, e 200/2001, do 27 de agosto,

DISPOÑO:

Artigo único.-Autorízase o cesamento de actividades definitivo total do centro de menores Xesús de Nazaret-Palavea (A Coruña).

Disposición derradeira

A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, tres de maio de dous mil dous.

Manuela López Besteiro

Conselleira de Familia e Promoción do Emprego,

Muller e Xuventude