Adoptado acordo polo Consello da Xunta de Galicia, en sesión do día 22 de marzo de 2002, relativo á adxudicación definitiva dunha emisora en ondas métricas con modulación de frecuencia, resulta necesario dar publicidade ó mencionado acordo, unha vez cumpridos os requisitos que se determinan no Decreto 156/1989, do 27 de xullo, modificado parcialmente polo Decreto 35/1992, do 6 de febreiro, que regula o procedemento de concesión de emisoras
de radiodifusión sonora en ondas métricas con modulación de frecuencia
RESOLVO:
Facer público o acordo do Consello da Xunta de Galicia, adoptado en reunión do día 22 de marzo de 2002, polo que se adxudica definitivamente o servicio de radiodifusión sonora en ondas métricas con modulación de frecuencia a favor do Concello de Catoira, coas características técnicas que figuran no anexo á presente resolución.
Santiago de Compostela, 2 de abril de 2002.
Ignacio José Otero López
Director xeral de Comunicación Social
e Audiovisual
ANEXO
O Consello da Xunta de Galicia, en reunión do día 22 de marzo de 2002 adoptou, entre outros, o seguinte acordo:
«Outorga-la concesión definitiva para a posta en funcionamento dunha emisora, de carácter municipal, para a súa explotación en réxime de xestión directa do servicio de radiodifusión sonora en ondas métricas con modulación de frecuencia a favor do Concello de Catoira, logo de concesión do dominio público para a explotación do servicio e autorización da posta en funcionamento outorgada pola Secretaría de Estado das Telecomunicacións e para a Sociedade da Información, con suxeición ás normas contidas contidas no artigo 26 e disposición adicional sexta da Lei 31/1987, do 18 de decembro, de ordenación das telecomunicacións, así como o establecido na Lei 11/1998, do 24 de abril, xeral de telecomunicacións, no Real decreto 169/1989, do 10 de febreiro, polo que se aproba o Plan Técnico Nacional de Radiodifusión Sonora en FM, o Real decreto 1388/1997, do 5 de setembro, que amplía as frecuencias do dito plan, no Real decreto 1273/1992, do 23 de outubro, polo que se regula o outorgamento das
concesións demaniais do dito servicio ás corporacións locais, e na orde da Consellería da Presidencia e Administración Pública do 25 de febreiro de 1992 (DOG nº 50, do 12 de marzo seguinte) que abre o prazo de presentación de solicitudes de emisoras de radiodifusión sonora en ondas métricas con modulación de frecuencia para a súa explotación polas corporacións locais da Comunidade Autónoma de Galicia.
O Concello de Catoira solicitou a concesión dunha emisora en ondas métricas con modulación de frecuencia ó amparo do Decreto 156/1989, do 27 de xullo, modificado parcialmente polo Decreto 35/1992, do 6 de febreiro, que regula o procedemento de concesión de emisoras de FM. A concesión provisional deste servicio foille outorgado, con carácter provisional, por acordo do Consello da Xunta de Galicia do 4 de marzo de 1994.
A Consellería de Cultura, Comunicación Social e Turismo adoptará as medidas necesarias para a execución deste acordo, conforme coas funcións que lle atribúe o Decreto 8/1998, do 8 de xaneiro, polo que se desenvolve a estructura orgánica da Consellería de Cultura, Comunicación Social e Turismo.
A frecuencia asignada queda condicionada, de se-lo caso, ó trámite de coordenación internacional.
Características técnicas
Provincia: Po.
Concello: Catoira.
Frecuencia (MHz): 107.1.
Coordenadas:
42º 40' 04'' N.
08º 43' 17'' W.
Cota (m): 20.
Denominación da emisión: 256KF8EHF.
Potencia radiada aparente máxima (w): 50.
Potencia máxima nominal do equipo transmisor (w): 20.
Potencia de saída autorizada do equipo transmisor (w): 16.
Sistema radiante: 2 Dipolos, omnidireccional.
Altura sobre o chan do centro eléctrico da antena (m): 15.
Altura do mastro sobre o chan: 18.
Altura efectiva máxima (m): 25.
Polarización: circular».
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA