Dentro do plan de actividades da Escola Galega de Administración Pública para 2002 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Revista de Dereito Urbanístico e Medio Ambiente, unhas Xornadas sobre convenios urbanísticos, convocatoria que se desenvolverá conforme as seguintes bases:
1. Obxectivos.
Para moitos, das tres clásicas áreas de división do urbanismo, planeamento, disciplina e xestión, é esta última a que encerra a parte realmente práctica pois sen xestión non hai posibilidade de materializar actos concretos. Pois ben, de entre tódolos instrumentos con que conta o urbanista á hora de poñer en marcha os seus plans, destaca singularmente a figura dos convenios, verdadeira lei interpartes que contribúe a axiliza-la tramitación e poder obter resultados de maneira o máis inmediata posible dentro dunhas marxes de manobra razoables.
As presentes xornadas analizan a figura do convenio no seu máis amplo sentido, con referencia concreta á súa regulamentación na lexislación autónoma
e ó seu tratamento no conxunto das disposicións urbanísticas aplicables. É sen dúbida unha importante oportunidade para coñece-lo modus operandi, cómo debe actuarse e a aplicabilidade a determinadas actuacións urbanísticas.
2. Contido.
Trataranse estes temas:
-Concepto e natureza xurídica dos convenios urbanísticos cos particulares. Procedemento de elaboración e aprobación.
-Réxime xurídico dos convenios urbanísticos, con especial referencia ós seus límites e responsabilidade da Administración pública polo seu incumprimento. Análise da lexislación urbanística autonómica, con especial referencia á Lei 1/1997, de Galicia.
-Os convenios urbanísticos na xurisprudencia do Tribunal Supremo e do Tribunal Superior de Xustiza de Galicia.
-Análise pormenorizada dos convenios urbanísticos no ámbito do planeamento. Análise dun suposto práctico.
-Análise pormenorizada dos convenios de xestión urbanística. Análise dun suposto práctico.
-Expropiación e convenios urbanísticos. Análise dun suposto práctico.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos do edificio administrativo da Xunta de Galicia en Lugo (sito na Ronda da Muralla, s/n, da citada cidade), os días 7 e 8 de maio de 2002.
5. Inscrición.
-Prazo: remata o venres, día 3 de maio de 2002.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 6 de maio, de 8.30 a 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 10 de abril de 2002.
Domingo Bello Janeiro
Director da Escola Galega de Administración Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA