O Servicio Galego de Saúde, para mellora-la prestación da asistencia sanitaria na Comunidade Autónoma, concedeu permisos de utilización temporal a favor de distintos concellos de varias ambulancias da súa propiedade. Algúns deses vehículos, en virtude do tempo transcorrido, non son útiles na actualidade para a realización de labores de ambulancia e de acordo co Decreto 42/1998, do 15 de xaneiro,
polo que se regula o transporte sanitario superan o tempo máximo establecido para o seu destino a fins sanitarios. Por todo iso, os concellos de Sarria (Lugo), Ortigueira (A Coruña), Paradela (Lugo), Toques (A Coruña), Forcarei (Pontevedra), Vilalba (Lugo), Sada (A Coruña), Ribeira (A Coruña) e Viveiro (Lugo) solicitan a cesión dos vehículos que utilizan para seren destinados a outros fins que redunden no interese xeral do municipio.
Con este fin o Servicio Galego de Saúde tramitou o expediente de cesión dos ditos vehículos, de conformidade co disposto no artigo 35 bis da Lei 3/1985, do 12 de abril, do patrimonio da Comunidade Autónoma galega, engadido pola Lei 11/1996, do 30 de decembro, de orzamentos xerais da Comunidade Autónoma para 1997, e no artigo 96 bis do seu regulamento, aprobado polo Decreto 50/1989, do 9 de marzo, engadido polo Decreto 238/1998, do 24 de xullo (DOG nº 156, do 13 de agosto).
Por todo o exposto e en uso das facultades que me confire o artigo 38 da Lei 1/1983, do 22 de febreiro, reguladora da Xunta e do seu presidente reformada pola Lei 11/1988, do 20 de outubro,
DISPOÑO:
Artigo 1º
Acórdase a cesión dos seguintes vehículos a favor dos concellos de: Sarria (Lugo), Ortigueira (A Coruña), Paradela (Lugo), Toques (A Coruña), Forcarei (Pontevedra), Vilalba (Lugo), Sada (A Coruña), Ribeira (A Coruña) e Viveiro (Lugo):
Vehículo Matrícula Concello
Nissan Vanette C-6139-BS Sarria Renault Trafic C-7252-BC Sarria Nissan Vanette C-6287-AZ Ortigueira Nissan Vanette LU-7337-J Paradela Nissan Practic C-2088-BG Toques Nissan Vanette PO-1496-AC Forcarei Nissan Vanette C-6144-BS Vilalba Nissan Serena C-1142-BL Sada Nissan Vanette C-8527-AS Ribeira Renault 900 F LU-3233-S Viveiro
Artigo 2º
A cesión queda sometida ás seguintes cláusulas:
a) Os bens cedidos destinaranse a fins de utilidade pública ou interese social do concello tal e como esixe o artigo 96 bis do Decreto 50/1989 e 35 bis da Lei 3/1985, do patrimonio da Comunidade Autónoma.
b) Coa cesión outorgaralle ó concello a propiedade do vehículo, comprometéndose este a realizar ante a Xefatura Provincial de Tráfico os trámites precisos para o cambio da titularidade do vehículo.
c) Os bens cedidos destinaranse a outros fins de utilidade pública ou interese social do Concello, debendo o Concello proceder a retirar do vehículo todo anagrama ou rotulación que puidera identificalo como vehículo sanitario, así como a aboa-los gastos que puidera orixina-la transformación do dito vehículo.
Artigo 3º
A cesión formalizarase mediante acta subscrita polo director xeral da División de Recursos Económicos do Sergas e o órgano competente dos distintos concellos, debendo constar nela o acordo de cesión e a aceptación do cesionario.
Disposición derradeira
O Servicio Galego de Saúde, a través do seu órgano competente, realizará os trámites necesarios para a efectividade de canto se dispón na presente orde.
Santiago de Compostela, 5 de marzo de 2002.
José María Hernández Cochón
Conselleiro de Sanidade e Presidente
do Servicio Galego de Saúde
