De acordo co establecido no artigo 199 do Real decreto 2568/1986, do 28 de novembro, polo que se aproba o Regulamento de organización e funcionamento e réxime xurídico das entidades locais, e no Decreto 101/1983, do 14 de xullo, sobre libros de actas de acordos e resolucións das corporacións locais, e co obxecto de facilita-la transcrición mecanizada das actas das sesións dos órganos colexiados e resolucións dos presidentes das ditas corporacións dentro do ámbito da Comunidade Autónoma de Galicia, publicouse o Decreto 418/2001, do 29 de novembro, polo que se regula o papel numerado especial da Comunidade Autónoma de Galicia para uso das corporacións locais.
Como complemento do Decreto 418/2001, do 29 de novembro, e a través deste decreto, preténdese
fixa-lo prezo de venda do papel numerado especial da Comunidade Autónoma de Galicia para uso das corporacións locais.
Por todo isto, para o correcto desenvolvemento e execución das previsións destas normas, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día un de febreiro de dous mil dous,
DISPOÑO:
Artigo 1º
Fíxase o prezo de cada folla do papel numerado especial da Comunidade Autónoma de Galicia para uso das corporacións locais, sinalado no artigo 2º do Decreto 418/2001, do 29 de novembro, en 0,06 euros a unidade, IVE incluído.
Disposicións derradeiras
Primeira.-Facúltase o conselleiro de Xustiza, Interior e Relacións Laborais para dictar cantas disposicións sexan necesarias para o desenvolvemento deste decreto.
Segunda.-Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, un de febreiro de dous mil dous.
Manuel Fraga Iribarne
Presidente
Antonio Pillado Montero
Conselleiro de Xustiza, Interior e Relacións Laborais