Nesta delegación provincial séguese expediente sancionador número P-41/2001, contra José Antonio Costas Simón e a empresa operadora Recreativos Bull'S Daver, S.L., por presunta infracción da Lei 14/1985, do 23 de outubro, no que se resolveu, de conformidade co disposto no artigo 59.4º da Lei 30/1992, do 26 de decembro, de réxime xurídico das administracións públicas e do procedemento administrativo común, publica-lo acordo de iniciación e máis do prego de cargos, por resultar descoñecido o domicilio de José Antonio Costas Simón.

Acordo de apertura.

O director xeral de Interior e Protección Civil, por delegación do conselleiro de Xustiza, Interior e Relacións Laborais, con data 5 de novembro de 2001 adoptou o seguinte acordo:

1. Incoar expediente sancionador, de conformidade co establecido na Lei das Cortes Xerais 34/1987, do 26 de decembro, de potestade sancionadora da Administración pública en materia de xogos de sorte, envite ou azar:

-Á empresa operadora Bull'S Daver, S.L. GA-O-0526.

-Ó titular do establecemento José Antonio Costas Simón.

2. Nomear instructor e secretaria a:

-Juan Girón Astray e

-Clara Eugenia García Bermúdez, respectivamente.

Prego de cargos.

1. Te-la empresa operadora Bull'S Daver, S.L., o día 10 de setembro de 2001, instalada no establecemento público denominado Bar Laureano, sito na rúa avda. de Castrelos, nº 446, do Concello de Vigo, da titularidade de José Antonio Costas Simón,

conxuntamente co titular do local, unha máquina recreativa tipo guindastre, modelo Crane Saurus, carecendo de toda a documentación esixida legalmente para a súa instalación, o non estar homologada nesta Comunidade Autónoma de Galicia, nin estar excluída do Regulamento de máquinas recreativas e de azar, da Xunta de Galicia, aprobado polo Decreto 106/1998, do 12 de febreiro, que desenvolve a Lei 14/1985, de xogos e apostas de Galicia, do 23 de outubro.

2. Tales feitos poderían constituír infracción moi grave tipificada no artigo 28 alíneas c) e g) da Lei 14/1985, do 23 de outubro, (reguladora dos xogos e apostas de Galicia), modificada pola Lei 7/1991, do 19 de xuño (de tributación sobre o xogo, disposición adicional terceira).

Ó considerarse como moi grave, pódelle corresponder de acordo co artigo 31.1º da mesma lei, unha multa desde 6.010,12 euros ata 12.020,24 euros, que se poderán elevar ata 60.101,21 euros no suposto de reincidencia. A sanción será imposta polo Consello da Xunta de Galicia por proposta do conselleiro de Xustiza, Interior e Relacións Laborais.

3. Confirma-la precintaxe da máquina e acorda-lo seu comiso.

O que se notifica de acordo co disposto no artigo 7 da Lei das Cortes Xerais 34/1987, do 26 de decembro, de potestade sancionadora da Administración pública en materia de xogos de sorte, envite ou azar, dispoñendo o interesado dun prazo de oito días a partir do seguinte ó da publicación desta notificación, para que poida presentar prego de descargos, no que poderá solicita-lo recibimento a proba do expediente na forma previda na alínea 2.b) do devandito precepto legal.

Pontevedra, 11 de xaneiro de 2002.

Antonio Coello Bufill

Delegado provincial de Pontevedra

CONSELLERÍA DE FAMILIA E PROMOCIÓN DO EMPREGO,

MULLER E XUVENTUDE