Dentro do plan de actividades da Escola Galega de Administración Pública para 2002, e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Revista de Derecho Urbanístico y Medio Ambiente, unhas xornadas sobre urbanismo e contaminación acústica, convocatoria que se desenvolverá conforme as seguintes bases:
1. Obxectivos.
Cada día é máis acentuada a tendencia a ter en conta todo o relacionado co xenericamente chamado ambiente. Tradicionalmente a contaminación foi, e é, a pedra angular contra a que loitan institucións tanto públicas coma privadas ó quereren preserva-la calidade de vida. Sen embargo, algunhas contaminacións son tidas pouco en conta por consideralas de menor importancia. A contaminación acústica, o que vulgarmente chamamos ruído, é unha delas e, en cambio, é unha das máis prexudiciais para a saúde dos seres vivos, tal e como sinala a Organización Mundial da Saúde en reiterados informes.
Preténdese con estas xornadas centra-lo problema que presenta esta situación e sinala-las posibles solucións para palia-lo constante e progresivo aumento deste tipo de contaminación, que lenta pero inexorablemente vai apoderándose do noso medio.
2. Contido.
Trataranse estes temas:
-A garantía constitucional da protección do medio natural. Instrumentos legais de loita contra a contaminación acústica. Competencias das administracións públicas e mecanismos de coordinación e cooperación. Análise da normativa existente.
-Réxime xurídico da regulación do ruído na edificación. Análise das zonas de sensibilidade acústica.
-Tratamento do ruído na normativa de actividades clasificadas.
-Análise da Lei 7/1997, do 11 de agosto, de protección da contaminación acústica.
-A planificación urbanística como instrumento de prevención da contaminación acústica: réxime das determinacións dos plans urbanísticos e os estándares urbanísticos. Exemplos prácticos.
-Réxime xurídico do estudio acústico de proxectos de obras e instalacións e efectos sobre o réxime urbanístico.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos da delegación da Consellería da Presidencia e Administración Pública en Lugo (sita en Ronda da Muralla, s/n, da citada cidade), os días 13 e 14 de febreiro de 2002.
5. Inscrición.
-Prazo: remata o luns, día 11 de febreiro de 2002.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 12 de febreiro, de 8.30 a 14.30 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase neste documento a natureza da actividade e as datas da súa realización.
Santiago de Compostela, 23 de xaneiro de 2002.
Domingo Bello Janeiro
Director da Escola Galega
de Administración Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA