Dentro do plan de actividades da Escola Galega de Administración Pública para 2002 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración co Centro de Estudios Xurídicos Superiores (CEXUS), unhas xornadas sobre o reto das administracións públicas ante o euro; convocatoria que se desenvolverá conforme as seguintes bases:

1. Obxectivos.

Axudar a resolve-las dúbidas, dificultades e problemas que a entrada en vigor do euro pode suscitar no seo das administracións públicas e coñecer, ó mesmo tempo, as particularidades máis significativas da moeda única.

2. Contido.

Trataranse estes temas:

-Cuestións xerais. O euro: unha moeda única para doce países. Cesión de soberanía: o Banco Central Europeo e o Banco de España. Efectos sobre a economía e as empresas. Calendario: o período de coexistencia coa peseta. Os códigos de boas prácticas.

-Cuestións xurídicas e de organización administrativa. A lexislación sobre o euro: repaso da normativa comunitaria e estatal. Os plans para a introducción do euro, elaborados polas diversas administracións. As comisións creadas polas administracións para o estudio e seguimento da introducción da moeda única.

-Euro, administracións públicas e o día 1 de xaneiro de 2002. Efectos para a Administración: contabilidade, orzamentos, tributos, sancións, rexistros administrativos, débeda pública, pagamentos e cobramentos. Conversión e redondeo. A lexislación vixente o 1 de xaneiro de 2002 que menciona cantidades de pesetas. Os códigos de boas prácticas.

-Mesa redonda/coloquio.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos da Delegación da Consellería da Presidencia e Administración Pública na Coruña (praza de Pontevedra, s/n, da citada cidade), os días 17 e 18 de xaneiro de 2002.

5. Inscrición.

-Prazo: remata o martes, día 15 de xaneiro de 2002.

-Tramitación de solicitudes: as solicitudes irán dirixidas ó director da Escola Galega de Administración Pública; polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión chamando por teléfono, o día 16 de xaneiro, das 8.30 ás 14.30 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e a data da súa realización.

Santiago de Compostela, 17 de decembro de 2001.

Domingo Bello Janeiro

Director da Escola Galega

de Administración Pública