En cumprimento da medida cautelar adoptada pola Sala do Contencioso-Administrativo do Tribunal Superior de Xustiza de Galicia, relativa á modificación do baremo na categoría de médicos de familia, a División de Recursos Humanos do Servicio Galego de Saúde, con data do 17 de novembro de 2001 (DOG número 229, do 27 de novembro), dictou resolución acordando a revisión da puntuación outorgada ós cursos dos aspirantes inscritos na citada categoría na convocatoria do ano 2000.

Unha vez efectuada a revisión da baremación, as listaxes provisionais publicaranse de xeito simultáneo nos taboleiros de anuncios das direccións provinciais do Sergas e dos centros asistenciais dependentes o día da publicación deste anuncio. Nas listaxes incluirase a nova relación de aspirantes coas puntuacións obtidas logo da modificación da baremación e a orde de prelación derivada desta.

Os interesados poderán formular reclamación contra as listaxes provisionais ante a dirección provincial do Sergas que corresponda, no prazo máximo de dez días hábiles, contados a partir do seguinte ó da data de publicación.

Santiago de Compostela, 4 de decembro de 2001.

Valeriano Martínez García

Director xeral da División de Recursos Humanos