Dentro do Plan de actividades da Escola Galega de Administración Pública para o 2001, e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, con
vócanse, en colaboración coa Escola de Práctica Xurídica de Santiago de Compostela e co Instituto de Criminoloxía e Equipo Multidisciplinar de Estudio de Investigación sobre Menores (EMEIM-USC), unhas xornadas sobre a Lei orgánica 5/2000, do 12 de xaneiro, reguladora da responsabilidade penal do menor que se desenvolverá segundo as seguintes bases.
1. Obxectivos.
O novo proceso de menores introducido pola Lei orgánica 5/2000, do 12 de xaneiro, reguladora da responsabilidade penal do menor, supón un cambio
substancial no conxunto normativo aplicable ós menores infractores. A súa recente entrada en vigor, o 13 de xaneiro, xunto coa súa transcendencia na vida xurídica e social do país, xustifican a realización dun estudio detallado da dita regulación.
Estas xornadas pretenden pór á disposición dos distintos operadores xurídicos (funcionarios, avogados, fiscais, educadores, etc.) un exame serio e rigoroso das disposicións legais recollidas na citada lei, contando para iso cun amplo elenco de profesionais do dereito, pertencentes á maxistratura, fiscalía, universidade e administración autonómica.
A través dos relatorios propostos preténdese a análise da solución político-criminal adoptada pola lei e dos principios xerais que a informan (natureza sancionadora-socioeducativa do procedemento e das medidas aplicables, diferenciación de diversos tramos para os efectos procesuais e sancionadores na categoría de infractores menores de idade, exame do novo sistema procesual penal e das súas peculiaridades procesuais, flexibilidade na adopción e execución das medidas, competencia das entidades autónomas relacionadas coa reforma e protección de menores para a execución das medidas impostas na sentencia, control xudicial da execución das medidas, etc.).
O dito estudio enfocarase desde unha perspectiva múltiple, que ofreza unha visión completa das disposicións abordadas, e ofertaráselles ós profesionais en xeral, e especialmente a aqueles directamente relacionados co proceso, un programa específico de calidade.
2. Contido.
Trataranse estes temas:
-Visión xeral e criterios inspiradores da Lei orgánica 5/2000.
-Idade psicolóxica e minoría da idade penal.
-As medidas susceptibles de ser impostas ós menores e as regras para a súa aplicación.
-O proceso de menores: a fase de instrucción.
-O proceso de menores: as medidas cautelares.
-Proceso de menores: audiencia, sentencia e recursos.
-A responsabilidade civil dos menores.
-A execución das medidas: aspectos penais e procesuais.
-As competencias da Administración autonómica no novo proceso de menores: execución das medidas e programas.
-A intervención dos equipos técnicos no novo proceso de menores.
-Intervención da autoridade xudicial, o ministerio fiscal, o avogado e a policía no novo proceso de menores.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocada desenvolverase no salón de actos da EGAP (polígono das Fontiñas; rúa de Madrid, 2-4, 15707, Santiago de Compostela) os días 10, 11 e 12 de decembro de 2001.
5. Inscrición.
-Prazo: remata o mércores, día 5 de decembro de 2001.
-Tramitación de solicitudes: as solicitudes irán dirixidas ó director da Escola Galega de Administración Pública; polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando por teléfono, o día 7 de decembro, das 10 ás 14.45 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento do seminario, así como a de cancelalo, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate deste seminario, a aquelas persoas inscritas que concorresen asiduamente a este, cando a súa asistencia sexa igual ou superior ó 85% das horas lectivas programadas, e expresarase neste documento a natureza da actividade e as datas da súa realización.
8. Retransmisión pola Internet.
As persoas interesadas en segui-lo desenvolvemento desta xornada pola Internet poden facelo a través do seguinte enderezo: www.egap.xunta.es.
Santiago de Compostela, 13 de novembro de 2001.
Domingo Bello Janeiro
Director da Escola Galega de Administración Pública